Qazaqstannyń halyqaralyq qatynastar keńesi QR-dyń Ortalyq Azııadaǵy strategııasyn talqylady
ASTANA. QazAqparat - Qazaqstannyń halyqaralyq qatynastar keńesi (QHQK) 14 qyrkúıek kúni «Qazaqstannyń Ortalyq Azııadaǵy strategııasy: óńirlik yntymaqtastyqtyń vektoryn nyǵaıtý» atty aımaqtyq qaýipsizdik pen turaqtylyq sııaqty ózekti máselelerge arnalǵan sarapshylyq kezdesý ótkizdi.
Álemdik geosaıası ózgeristerdiń aıasynda Ortalyq Azııa jańa saıası jáne áleýmettik-ekonomıkalyq transformatsııa kezeńine kiredi. Aımaqtaǵy elder ózderiniń halyqaralyq jáne aımaqtyq úderisterdegi rólin túsinýge tyrysýda. Soǵan baılanysty óńirlik yntymaqtastyq máselesi kúnnen-kúnge artyp keledi.
Saraptamalyq pikir almasý barysynda qatysýshylar halyqaralyq kún tártibinde turǵan mańyzdy máselelerdi, aımaqtyq saıasat jáne qaýipsizdik salasyndaǵy sońǵy oqıǵalardy talqylady. Solardyń biri - Qazaqstannyń Ortalyq Azııadaǵy strategııasy.
Ǵylymı sharaǵa Qazaqstannyń jetekshi sarapshylary, QR Prezıdenti Ákimshiliginiń ókilderi, QR Syrtqy ister mınıstrliginiń jaýapty qyzmetkerleri, QR Parlamenti Májilisiniń depýtattary, Qazaqstanda akkredıtatsııadan ótken halyqaralyq uıymdar men dıplomatııalyq mıssııa ókilderi qatysty.
QHQK 2017 jyldyń 10 mamyrynda Qazaqstan saıası ǵylymdar qaýymdastyǵynyń jáne «Qazaqstan dıplomattary birlestiginiń» bastamasymen qurylǵan. Keńestiń quryltaı jınalysynda Parlament Senatynyń Tóraǵasy Qasym-Jomart Toqaev osy birlestiktiń Qurmetti tóraǵasy bolyp saılandy. Keńestiń tóraǵasy - belgili saıasttanýshy Erlan Qarın. Syrtqy ister mınıstri Qaırat Ábdirahmanov, Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev, otandyq jetekshi taldaý ortalyqtarynyń basshylary Keńes Tóralqasynyń quramyna kiredi.
Keńestiń basty maqsaty - halyqaralyq qatynastar salasyndaǵy otandyq sarapshylardy biriktirý jáne QR Prezıdenti Nursultan Nazarbaevtyń mańyzdy halyqaralyq bastamalaryn ilgeriletý, sondaı-aq, jahandyq turǵydaǵy kún tártibinde turǵan eń ózekti máselelerdi talqylaý jáne usynystar ázirleý.
