Qazaqstannyń halyqaralyq áýejaılarynda biryńǵaı talaptardy bekitý qarastyrylady

ASTANA. QazAqparat - Búgin Senattyń Ekonomıkalyq saıasat, ınvestıtsııalyq damý jáne kásipkerlik komıtetiniń otyrysynda «Qazaqstan Respýblıkasynyń keıbir zańnamalyq aktilerine jol-kólik ınfraqurylymyn, kóliktik logıstıkany jáne avıatasymaldy damytý máseleleri boıynsha ózgerister men tolyqtyrýlar engizý týraly» zań jobasy talqylandy. Atalǵan qujat Elbasynyń «100 naqty qadam» Ult josparyn júzege asyrý maqsatynda ázirlenip otyr.

Atap aıtqanda, 58-qadam boıynsha elimizdegi avtomobıl joldaryn basqarý jónindegi Ulttyq operatordyń avtomobıl joldaryn kútip-ustaýdaǵy jáne jol servısin damytýdaǵy jaýapkershiligin bekitý boıynsha qyzmetti jetildirý qarastyrylǵan bolatyn. Sonymen qatar, Ulttyq operatorǵa qarjylandyrýdyń balama kózderin tartý jáne birtindep ózin-ózi qarjylandyrýǵa kóshý múmkindigi beriledi. Budan bólek, joldarǵa aqyly júıeni engizýge qatysty normalar qamtylady.

«Elbasynyń «100 naqty qadam» Ult josparynyń 65-i qadamy logıstıkany damytýdy qarastyrady. Bul rette Azııadan Eýropaǵa tranzıttiń kedergisiz ótýine áser etetin «Eýrazııalyq transqurlyqtyq dálizi» atty mýltımodaldy kólik dálizin qurý josparlanǵan bolatyn. Osy jospardyń qajettiligine oraı, kólik ınfraqurylymyn damytý boıynsha normatıvtik-quqyqtyq bazalar jetildiriledi», - dedi Investıtsııalar jáne damý vıtse-mınıstri Jeńis Qasymbek. Sonymen qatar, zań jobasymen avıatsııa salasyn damytý maqsatynda (Ult josparynyń 66-67-68-qadamdary-red.) Qazaqstannyń halyqaralyq áýejaılarynda biryńǵaı talaptardy bekitý qarastyrylady. Sonymen qatar, servısti jaqsartý maqsatynda halyqaralyq mártebesi bar áýejaılardyń halyqaralyq standarttar boıynsha aýdıtten ótý talaptary bekitiledi. «Áýe tasymaldaryn tolyq paıdalaný maqsatynda halyqaralyq áýe tasymaly kezine elektrondyq qujat aınalymyn engizý josparlanady. Sonymen qatar, júkterdiń avıatsııalyq tasymaly boıynsha biryńǵaı talaptar men tehnologııalyq rásimder engiziledi. Osynyń ózi júkterdi óńdeýdi 10 kúnnen 4 saǵatqa deıin qysqartýǵa múmkindikter beredi», - dedi J. Qasymbek.