Qazaqstannyń halyqaralyq áýejaılarynda biryńǵaı talaptar bekitý qarastyrylady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jol-kólik ınfraqurylymyn, kóliktik logıstıkany jáne avıatasymaldy damytý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldady. Atalǵan qujat Elbasynyń «100 naqty qadam» Ult josparyn júzege asyrý maqsatynda ázirlenip otyr.
Zań jobasy arqyly elimizdegi avtomobıl joldaryn basqarý jónindegi Ulttyq operatordyń avtomobıl joldaryn kútip-ustaýdaǵy jáne jol servısin damytýdaǵy jaýapkershiligin bekitý boıynsha qyzmetti jetildirý qarastyrylady. Sonymen qatar, Ulttyq operatorǵa qarjylandyrýdyń balama kózderin tartý jáne birtindep ózin-ózi qarjylandyrýǵa kóshý múmkindigi beriledi.
«Elbasynyń «100 naqty qadam» Ult josparynyń 65-i qadamy Qazaqstannyń halyqaralyq transporttyq kommýnıkatsııalyq aǵynmen, ıntegratsııasyn qarastyrady. Aıta keterligi, onyń aıasynda Azııadan Eýropaǵa tranzıttiń kedergisiz ótýine áser etetin «Eýrazııalyq transqurlyqtyq dálizi» atty mýltımodaldy kólik dálizin qurý josparlanǵan bolatyn. Munyń ózi «Nurly jol» baǵdarlamasynda qamtylyp otyr ári bul Qytaıdyń «Jibek jolynyń» ekonomıkalyq beldeýi jobasymen úılesedi. Tutastaı alǵanda, osy baǵytta Qytaıdan Eýropaǵa deıin mýltımodaldy dálizin damytýǵa septigin tıgizedi», - dedi Investıtsııalar jáne damý mınıstri Áset Isekeshev. Onyń sózine qaraǵanda, zań jobasymen avıatsııa salasyn damytý maqsatynda Qazaqstannyń halyqaralyq áýejaılarynda biryńǵaı talaptardy bekitý qarastyrylady. Sonymen qatar, servısti jaqsartý maqsatynda halyqaralyq mártebesi bar áýejaılardyń halyqaralyq standarttar boıynsha aýdıtten ótý talaptary bekitiledi.
