Qazaqstannyń halyqaralyq arenadaǵy bedeli Nursultan Nazarbaev esimimen tyǵyz baılanysty - Norov
«Nursultan Nazarbaevtyń atymen Qazaqstannyń qalyptasý jáne damý jyldary, eldegi mańyzdy konstıtýtsııalyq jáne saıası reformalary, áleýmettik-ekonomıkalyq jetistikter ósimi men tabystar tyǵyz baılanysty. Jańasha ádister men onyń der ýaqytynda qabyldanǵan sheshimderi Qazaqstandy saıası sabaqtastyǵy bar ári syrtqy saıası basymdyqtary aıqyn tabysty, turaqty jáne bedeldi memleketter qataryna shyǵarýǵa múmkindik berdi. Qazaqstannyń Tuńǵysh Prezıdentiniń atymen eldiń halyqaralyq arenadaǵy bedeliniń arta túsýi de tyǵyz baılanysty. Ol - halyqaralyq qoǵamdastyqtyń nazaryn ózine aýdarǵan iri aýqymdaǵy jańashyl ıdeıalardyń bastamashysy. Olardyń qatarynda Azııadaǵy ózara is-qımyl jáne senim sharalar keńesin, Eýrazııalyq ekonomıkalyq odaqtyń qurylýyn, ıadrolyq qarýsyzdaný problemlaryn, álemdik jáne dástúrli dinder basshylarynyń arasyndaǵy dıalogty aıtýǵa bolady», - dedi ol «Nursultan Nazarbaev. Jaýapty basshylyq: Sabaqtastyq pen evolıýtsııa» taqyrybyndaǵy halyqaralyq konferentsııa barysynda.
Norovtyń atap ótýinshe, sońǵy jyldary QR Tuńǵysh Prezıdentiniń belsendi qyzmetiniń arqasynda Ortalyq Azııa elderi arasyndaǵy yntymaqtastyq jandanyp, mańyzdy ózgerister baıqala bastady. Óńirdegi saıası ahýal da túbegeıli ózgerip, óńirlik jaqyndasý, senim men ózara túsinistiktiń qalpyna kelýi oryn alyp otyr.
«Nursultan Ábishuly ShYU-nyń damýyna, onyń negizin nyǵaıtyp, múshe memleketter arasyndaǵy dástúrli dostyq jáne tatý kórshilik qarym-qatynasty eseleı túsýge de zor úles qosty. QR Tuńǵysh Prezıdentiniń ShYU alańyndaǵy bastamalary halyqaralyq terrorızmge, ekstremızmge qarsy is-qımyldy kúsheıtý, esirtki taratpaý, múshe elderdiń saýda-ekonomıkalyq jáne kólik-logıstıkalyq áleýetin ashý baǵytyndaǵy naqty usynystarmen erekshelenetinin aıryqsha atap ótkim keledi», - dedi Vladımır Norov.
