Qazaqstannyń halyqaralyq arbıtrajy halyqaralyq yqpaldastyqqa belsendi qatysýda - Maıdan Súleımenov
ALMATY. 7 maýsym. QazAqparat /Erlik Erjanuly/ - Qazaqstandaǵy arbıtraj qozǵalysynyń bolashaǵy óte zor. Bul búgin Almatyda ótip jatqan «Qazaqstan Respýblıkasyndaǵy halyqaralyq kommertsııalyq arbıtraj jáne aralyq sottar.
Zańnama jáne qoldaný tájirıbesi» dep atalatyn semınarda aıtyldy. Ony AQSh-tyń halyqaralyq damý jónindegi agenttiginiń Sot bilimi jobasy, Qazaqstandyq halyqaralyq arbıtraj, Almaty qalalyq advokattar alqasy, QazGZÝ Jeke quqyq ǵylymı-zertteý ınstıtýty birigip uıymdastyrǵan bolatyn.
«Qazaqstandyq halyqaralyq arbıtraj 2005 jyly «Arbıtraj, halyqaralyq kommertsııalyq arbıtraj jáne aralyq sot týraly» zań qabyldanǵannan keıin qurylǵan bolatyn. Ol qazir jergilikti, aımaqtyq jáne halyqaralyq deńgeıdegi túrli daý-damaılardy sheshýge óz úlesin qosýda. Qazir bizde 150 arbıtr bar. Onyń jartysy sheteldik mamandar», - deıdi Qazaqstandyq halyqaralyq arbıtraj tóraǵasy, QazGZÝ Jeke quqyq ǵylymı-zertteý ınstıtýtynyń dırektory, QR UǴA akademıgi, zań ǵylymdarynyń doktory Maıdan Súleımenov. Ǵalymnyń aıtýynsha, Qazaqstannyń halyqaralyq arbıtrajy halyqaralyq yqpaldastyqqa belsendi túrde qatysýda. Ózge eldermen tyǵyz qarym-qatynas jasap, álemdegi jańa ıdeıalardy óz jumysyna engizýge barlyq kúsh-jigerin jumsaýda. Máselen aldaǵy aptada Sankt-Peterbýrgte TMD elderi arbıtrajdyq ınstıtýttarynyń kezdesýi ótpek.
