Qazaqstannyń halyq jazýshysy, aqyn Tumanbaı Moldaǵalıev dúnıeden ótti

Jazýshynyń uly Dáýren Moldaǵalıevtiń aıtýynsha, aqyn búgin, 10 qazan kúni, tańerteńgi saǵat 10 shamasynda ókpe qabynýynan qaıtys bolǵan.

Halyq jazýshysymen qoshtasý 12 qazan kúni saǵat 10.00-da M.Áýezov atyndaǵy Qazaq memlekettik akademııalyq teatrynda ótedi.

Qala ákimdiginiń habarlaýynsha, Tumanbaı Moldaǵalıev Keńsaı zıratyna jerlenetin bolady.

Qazaqtyń birtýar jazýshysy 1935 jyly 20 naýryzda Almaty oblysy, Eńbekshiqazaq aýdany, "Jarsý" sovhozynda dúnıege keldi. Tumanbaı Moldaǵalıev - syrshyl lırızmdi damytqan aqyn, Qazaqstannyń halyq jazýshysy.

1956 jyly Qazaq Memlekettik ýnıversıtetiniń fılologııa fakýltetin bitirdi. Óziniń shyǵarmashylyq eńbek jolyn «Lenınshil jas» gazeti men «Pıoner» jýrnalynan bastady. 1959-1970 jyldar aralyǵynda "Pıoner" jýrnalynda qyzmet atqardy. 1970-1973 jyldarda "Baldyrǵan" jýrnalynyń jaýapty hatshysy boldy. 1973 jyldan "Jazýshy" baspasy janyndaǵy Balalar jáne jastar ádebıetiniń bas redaktsııasy men "Jalynnyń" bas redaktory bolyp jumys istedi.

Tumanbaı Moldaǵalıevtyń óleń, poemalary 40-tan astam jınaq bolyp basylyp shyqty. 1954 jyly T.Moldaǵalıevtin tuńǵysh óleńi "Ýkraına qyzyna" jarııalandy. Ol Baıron, M.ıÝ.Lermontov, T.G.Shevchenko, S.Kapýtıkıan, Ǵ.Ǵulam, H.Ǵulam, R.Ǵamzatov, Zýlfııa, D.Jalsaraev jáne t.b. aqyndardyń shyǵarmalaryn qazaq tiline aýdardy.

Aqynnyń 1990 jyly 13 tomdyq shyǵarmalar jınaǵy, 2004 jyly 14 tomdyq shyǵarmalar jınaǵy jaryq kórdi. 1992 jyly Fızýlı atyndaǵy Halyqaralyq túrki dúnıesi aqyndary syılyǵy tapsyryldy. Tumanbaı Moldaǵalıev shyǵarmashylyǵynyń eń basty ereksheligi - onyń óleńderi sezimge toly boldy.