Qazaqstannyń halyq jazýshysy, aqyn Qadyr Myrza Áli ómirden ozdy
ALMATY. 24 qańtar. QazAqparat /Erbol Azanbek/ - 22 qańtardyń kúni qazaq ádebıetiniń asa kórnekti ókili, QR Memlekettik syılyǵynyń ıegeri, Qazaqstannyń halyq jazýshysy,
aqyn Qadyr Myrza Áli 77 jasqa qaraǵan shaǵynda ómirden ozdy.
Qadyr Myrza Áli 1935 jyly 5 qańtarda Batys Qazaqstan oblysynyń Jympıty kentinde dúnıege kelgen. 1958 jyly QazMÝ-diń fılologııa fakýltetin, 1960 jyly aspırantýrasyn bitirgen. 1985-62 jyldary "Baldyrǵan" jýrnalynda ádebı qyzmetker, 1962-65 jyldary "Juldyz" jýrnalynda bólim meńgerýshisi, jaýapty hatshy, bas redaktordyń orynbasary, 1968-78 jyldary "Jazýshy" baspasynda poezııa redaktsııasynyń meńgerýshisi, 1973 jyldan Qazaqstan Jazýshylar odaǵy poezııa sektsııasynyń meńgerýshisi, 1993 jyldan «Balaýsa» baspasynyń dırektory qyzmetterin atqarǵan.
Alǵashqy óleńi 1954 jyly "Pıoner" jýrnalynda jarııalanǵannan bastap qalamy qolynan túspegen aqynnyń 1959 jyly tuńǵysh óleńder jınaǵy - "Kóktem" jaryq kóredi. Odan keıin onyń elýden astam poezııalyq, prozalyq, sondaı-aq ádebı-syn kitaptary jaryq kórdi, óleńderi mektep oqýlyqtaryna endi. "Jańǵalaqtar", "Danyshpan", "Kishkene qojanasyr", "Noıan qoıan", "Alýan palýan", "Oı ormany", «Dala dıdary», "Bulbul baǵy", "Aq otaý", 2 tomdyq "Dombyra","Jeruıyq", «Ǵıbratnámá», «Jazmysh», «Eńirep ótken erler-aı», «Iirim», «Shyrǵalań», «Almas jerde qalmas», 2 tomdyq «Aforızmder jınaǵy» syndy týyndylary oqyrman júreginen oryn aldy. Aqyn bunymen qatar 200-den astam án sóziniń avtory, kórkem aýdarma salasynda da eleýli eńbek etti. Shyǵarmalary aǵylshyn, frantsýz, nemis, fın tilderine aýdarylǵan. Artyna eń kóp eńbek qaldyrǵan aqynnyń týyndylarynyń jalpy kólemi 32 tom. Onyń 20 tomdyǵy byltyr aqynnyń 75 jyldyǵyna oraı «Qazyǵurt» baspasynan jaryq kórgen bolatyn.
Birtýar daryn ıesin sońǵy saparǵa shyǵaryp salý rásimi erteń Almatydaǵy M.Áýezov atyndaǵy drama teatrynda bolady.
