Qazaqstannyń halyq sýretshisi Á. Ysmaıylovtyń «Álem kóshpendi boıaýynda» kitap-albomy jaryqqa shyǵady
ASTANA. 3 qyrkúıek. QazAqparat - Qazaqstannyń halyq sýretshisi Á.Ysmaıylovtyń týǵanyna 100 jyl tolýyna oraı «Álem kóshpendi boıaýynda» kitap-albomy jaryqqa shyǵady. Bul týraly búgin QR Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Kalıanbekov málim etti.
"Erteń, Qazaqstannyń halyq sýretshisi Áýbákir Ysmaıylovtyń týǵanyna 100 jyl tolýyna oraı, QR Mádenıet jáne aqparat mınıstrligi úsh tilde (qazaq, orys, aǵylshyn) «Álem kóshpendi boıaýynda» atty kitap-albomyn jarııalaıtyn bolady. Sonymen qatar mınıstrlik sýretshiniń týǵan-týystarynyń estelikteri negizinde derekti fılm túsirýdi qolǵa alýda. Oǵan reseılik mamandar da tartylatyn bolady. Atalmysh fılmdi biz bıylǵy jyldyń sońynda kórip qalýymyz yqtımal. 30 mınýttyq kartınada Á. Ysmaıylovtyń taǵdyry jáne onyń shyǵarmashylyq joly áriptesteriniń, mádenıet salasyndaǵy sarapshylardyń kózqarasymen beriletin bolady", - deıdi Bolat Kalıanbekov.
Áýbákir Ysmaıylov QR mádenıet qaıratkeri ár jyldary Eńbek Qyzyl Tý, Qurmet belgisi ordenderimen marapattalǵan, Qazaq KSR Eńbek sińirgen óner qaıratkeri, Qazaq KSR Halyq sýretshisi ataǵyn ıelengen. Onyń baı murasy búgingi tańda qazaq beıneleý óneriniń altyn qorynan laıyqty ornyn alyp otyr. Has sheberdiń keskindemelik jáne grafıkalyq týyndylary óziniń oryndalý sheberligimen, taqyryby men sıýjetiniń sheksiz alýandyǵymen, boıaýynyń baılyǵymen jáne obrazdarynyń fılosofııalyq kóterińkiligimen tańǵaldyrady.
