Qazaqstannyń Halyq partııasy janynan «Halyq keńesi» qurylady
Bul týraly atalǵan partııanyń jańa tóraǵasy Aıqyn Qońyrov málim etti, dep habarlaıdy QazAqparat tilshisi.
«Biz «Halyq keńesin» qurýdy qolǵa alyp jatyrmyz. Ondaǵy maqsat - halyqtyń muń-muqtajyn bizdiń partııa arqyly joǵaryǵa jetkizý. Onda kez kelgen adam óz máselesi, suraqtarymen qatar ıdeıalaryn ortaǵa sala alady. ıAǵnı partııanyń múshesi bolý mindetti emes. Odan bólek, keńes quramynda túrli sala sarapshylary bolady. Biz halyq keńesinde kóterilgen máselelerdi jergilikti jáne atqarýshy organdardyń aldyna shyǵaratyn bolamyz. Elimizdiń barlyq oblys ortalyqtarynda partııanyń fılıaly bar, sol jerlerde ár óńirdiń óz halyq keńesi jumys isteıdi», - dedi A. Qońyrov tilshilerdiń suraqtaryna jaýap bere turyp.
Sondaı-aq, tóraǵa jýyrda partııanyń saılaýaldy baǵdarlamasynyń bekitiletinin aıtty.
«Bizdiń bastamamyz aıqyn jáne kedergilerdi jeńetinimizge senimdimiz. 2021 jyly ótetin Májilis pen Máslıhat saılaýynda da jeńiske jetemiz degen oıdamyz. Bizdiń saılaýaldy baǵdarlamamyzda basty basymdyq eldegi áleýmettik máselelerdi sheshýge baǵyttalady. Aldaǵy 23 qarasha kúni elordada jańa ataý alǵan partııamyzdyń kezekten tys XVI sezin ótkizýdi josparlap otyrmyz. Sol jerde partııanyń saılaýaldy baǵdarlamasy bekitiletin bolady», - deıdi ol.
Aıta ketsek, buǵan deıin atalǵan partııanyń ataýy ózgergeni týraly habarlaǵan bolatynbyz.
Sondaı-aq, Qazaqstannyń halyq partııasynyń kezekten tys XV sezinde Ortalyq komıtettiń jańa músheleri saılandy .
Odan bólek, atalǵan sezde daýys berý arqyly biraýyzdan partııanyń jańa tóraǵasy saılandy.
