Qazaqstannyń Halyq qaharmany, qoǵam qaıratkeri Ázirbaıjan Mámbetov dúnıeden ozdy
A. Qarashanyń 18-i. QazAqparat ‑ Búgin 78 jasqa qaraǵan shaǵynda Qazaqstannyń Halyq qaharmany, KSRO Halyq ártisi, KSRO Memlekettik syılyǵynyń laýreaty, Qazaqstannyń jáne Qaraqalpaqstannyń halyq ártisi, áıgili rejısser, qoǵam qaıratkeri Ázirbaıjan Mádıuly Mámbetov dúnıeden ozdy,
dep habarlaıdy QazAqparat.
Belgili kınorejısser, akter ári professor Ázirbaıjan Mámbetov 1932 jyly RF Volgograd oblysy, Palasovka aýylynda dúnıege kelgen. 1952 jyly Almaty horeografııa ýchılışesin, 1957 jyly Máskeý qalasyndaǵy Memlekettik teatr óneri ınstıtýtynyń rejısserlik fakýltetin bitirdi. Instıtýtty bitirgen soń Á. Mámbetov M. Áýezov atyndaǵy Qazaq drama teatrynyń rejıssery, 1965 jyly bas rejıssery qyzmetterin atqardy. 1976 jyly oǵan KSRO Halyq ártisi ataǵy berildi.
Ázirbaıjan Mádıuly óziniń rejısserlyq eńbek jolyn 1957 jyly Qazaqtyń memlekettik akademııalyq drama teatrynda Sh. Husaıynovtyń «Ertis jaǵasynda» atty pesasyn qoıýmen bastaǵan. Osy óner ordasynda júrip Á. Mámbetov Q. Muhamedjanovtyń «Bóltirik bórik astynda», M. Áýezovtyń «Aıman-Sholpan», Q. Baıseıitov pen Q. Shańǵytbaevtyń «Beý, qyzdar-aı», Lope de Veganyń «Qyzǵanyshtan mahabbat» sekildi kóptegen pesalaryn qoıý arqyly komedııa janrynda darynyn ushtaı tústi. Ol kópshilik júreginen keń oryn alǵan «Án qanatynda», «Qan men ter», «Jaýshy» fılmderin qoıdy.
Á. Mámbetov 1999 jyldan bastap elordadaǵy Q. Qýanyshbaev atyndaǵy Qazaq memlekettik mýzykalyq-drama teatrynyń kórkemdik jaǵyn basqardy. Astana qalasynyń qurmetti azamaty, QR Úkimeti janyndaǵy Ádebıet, óner jáne sáýlet salasyndaǵy QR Memlekettik syılyqtary jónindegi komıssııanyń múshesi. «Otan», «Eńbek Qyzyl Tý», «Halyqtar dostyǵy», «Qazaqstannyń Halyq qaharmany» ordenderimen jáne medaldarymen marapattalǵan.
