Qazaqstannyń halyq ártisi Qudaıbergen Sultanbaev dúnıeden ozdy
ALMATY. 20 jeltoqsan. QazAqparat /Názıra Eleýhan/ - Qazaq óneri úlken qazaǵa ushyrady. Ótken jeksenbide 64 jasqa qaraǵan shaǵynda kórnekti akter, Qazaqstannyń halyq ártisi Qudaıbergen Sultanbaev qaıtys boldy.
Qudaıbergen Sultanbaev 1947 jyly Qyzylorda oblysynyń Aral aýdanynda dúnıege kelgen. Ónerdegi jolyn 1970 jyly «Gúlder» ansamblinde jaryq berilýshilikten bastaǵan ol halyqtyń súıikti akterine aınaldy.
Q. Sultanbaev san qyrly daryn ıesi edi. Onyń erekshe talantty satıra janrynda jarqyraı kórindi. Kórermenniń kópshiligi ony aldymen «Tamasha» oıyn-saýyq baǵdarlamasy arqyly jaqsy tanydy. Bul tusta osy otaýdyń irgesin qalaýshylardyń biri bolǵan akter ómiriniń sońyna deıin onyń baǵdarlamalaryna belsene qatysyp, kórermendi has ónerimen sýsyndatyp ótti.
Kórnekti akter kıno ónerinde de ózindik iz qaldyrdy. Rejısser S.Narymbetovtyń birneshe fılminde, sondaı-aq B.Shamshıevtiń «Kóktóbedegi kezdesý», Z.Podolskııdiń «Qosh bol, Medeý», S. Táýekeldiń «Mahambet», R.Ábdirashevtiń «Qaladan kelgen qyz», «Quraq kórpe» jáne taǵy da basqa kórkem fılmderde árqıly da qyzǵylyqty beıneler jasady.
Ol M.Áýezov atyndaǵy Qazaq memlekettik akademııalyq drama teatrynyń akterlik tobyna qabyldanyp, ómiriniń sońyna deıin osy teatrda qyzmet etti. Qara shańyraq sahnasynda kóptegen beınelerdi somdady. Sońǵy jańa jumysy, premerasy jýyrda ǵana ótken Á.Rahımovtyń «Qylmyskerge kýálik» qoıylymynda Ákim beınesi bolyp edi.
Sonymen qatar án salyp, birneshe aspaptarda da oınady. Sýretshilik ónerden de kende bolmady. Qazaq Ulttyq T.Júrgenov atyndaǵy Óner akademııasynda ustazdyq qyzmet atqardy.
Qudaıbergen Sultanbaev 1995-1999 jyldar aralyǵynda QR Parlamentiniń depýtattyǵyna saılandy. Ol osy kezeńde el úshin ózekti máseleniń biri - Aral problemasyna erekshe nazar aýdartyp, saılaýshylarynyń amanatyn oryndaǵyn edi.
Ol 1974-1992 jyldary Qurmanǵazy atyndaǵy Qazaq Memlekettik óner ınstıtýtynyń akterlik mamandyǵyn, Abaı atyndaǵy Memlekettik ýnıversıtetiniń zań fakýltetin bitirgen.
Qazaqstannyń halyq ártisi, Búkilodaqtyq estrada ártisteri konkýrsynyń laýreaty, kórnekti akter, ulaǵatty ustaz Qudaıbergen Sultanbaevpen qoshtasý 21 jeltoqsan kúni tańerteńgi saǵat 9.30-da M.Áýezov atyndaǵy Qazaq memlekettik akademııalyq drama teatrynda bolady.
