Qazaqstannyń Halyq ártisi Ǵarıfolla Qurmanǵalıevtiń týǵanyna 100 jyl tolýyna oraı «Ánshi daýysy» atty ádebı-sazdy kesh ótedi

dep habarlaıdy QazAqparat.

  Ǵarıfolla Qurmanǵalıev 1909 jyly Batys Qazaqstan oblysy, Qaratóbe aýdanynyń Aqkól aýylynda týǵan. 1993 jyly Almaty qalasynda dúnıeden ozdy.  Búkil halqy «Ǵarekeń» dep erkeletken óner ıesi 1967 jyldan bastap ómiriniń sońyna deıin Almatydaǵy Respýblıkalyq óner jáne tsırk stýdııasynda ustazdyq etken. Myńdaǵan shákirtter tárbıelep shyǵardy. Ol - ánderdi oryndaýda eshkimge uqsamaıtyn máneri bar birtýar daryn ıesi. Muhıt Meráliuly ánderiniń negizgi nasıhattaýshysy. Ózi de birneshe ánderdi týdyrǵan sazger. «Aqjaıyq», «Súıgen jar», «Nurjamal», «Jan erkem», «Aqqý», «Súıemin, týǵan ólkem» jáne basqa da ánderi halqymyzǵa keń taraǵan.

  Halyqtyń jáne Muhıt Meráliulynyń asqaq ánderiniń sheber oryndaýshysy, sazger Ǵarıfolla Qurmanǵalıevtiń bir ǵasyrlyq mereıtoıy qurmetine arnalǵan bul mádenı sharany QR Mádenıet jáne aqparat mınıstrligi uıymdastyryp otyr.

  Bul keshte Ǵarıfolla Qurmanǵalıevtiń Batys Qazaqstan óńiri men Almatydan kelgen shákirtteri asqaq ánderdi shyrqaıdy dep kútilýde. Óner keshine qoǵam jáne memleket qaıratkerleri, Parlament depýtattary shaqyrylǵan. Ánsúıer qaýymǵa esik ashyq.