Qazaqstannyń halyq ártisi Bıken Rımovanyń týǵanyna - 95 jyl

Bir top óner qaıratkerleri áıgili ártistiń atymen atalatyn Almaty oblystyq drama teatrynda baspasóz máslıhatyn ótkizip, óner maıtalmanyn eske aldy. Keshte talantty aktrısa týraly fılm kórsetilip, sońynan "Qos muńlyq" dramasy qoıyldy, dep habarlaıdy QazAqparat tilshisi.
 

Jýrnalısterdi jınap, baspasóz máslıhatyn ótkizgender  Bıken Rımovanyń kózin kórgender. Ár biri sahna sańlaǵymen kezdesken sátin tarıhı oqıǵaǵa balaıdy. Ónerin aıtpaǵanda adamı qasıetteriniń bıiktigine kýá bolǵan olar óner maıtalmanyn eshqashan umytýǵa bolmaıdy, - deıdi. Sondyqtan 95 jyldyǵyna arnap birneshe mádenı sharalardy ótkizýdi usyndy.

Máselen, Taldyqorǵanda osy mereıtoıǵa arnalyp qyzdar arasynda kórkemsóz oqýdan baıqaý ótkizý josparlanyp otyr. Sahna sańlaǵynyń qurmetine ózgede birneshe mándi mádenı sharalar uıymdastyrylmaq.  Naýryzda toılanatyn teatr kúni de Bıken Rımovaǵa arnalmaq.

«Beken Rımovanyń kim ekendigin, ómirde qandaı adam bolǵandyǵyn, halyqty qalaı súıgendigin, ózin qalaı ustaǵanyn, júris-turysy, minezi, elge jasaǵan jaqsylyǵy, qalamgerlik, akterlik sheberliginiń ózindik aıdyny, onyń ózindik ishki laboratorııasyn  kózi kórgen adamdar qazir aıtyp qalý kerek. Mine sondyqtan da eń aldymen kezdesýlerdi oqyrmandarmen jıi-jıi ótkizý kerek», - deıdi aqyn Ámire Árin. 

Aqyn Ámire Árinniń bul oıyn ártister qýana quptap otyr. Endi osy bastama boıynsha kezdesýler ótkizip, aty  ańyzǵa aınalǵan tulǵa jaıynda kóbirek áńgime aıtylmaq. Al kıno jáne teatr ártisi Saǵyndyq Jumadil bolsa oblystyq drama teatrdyń Bıken Rımovanyń atymen atalaýy eń zor baqytymyz, - deıdi. Sahna sańlaǵynyń óner ordasyndaǵy áriptesterine degen peıili de erekshe edi dep eske aldy.

«Osy Shahmet aǵamyzdyń «Aldar kóse» spektakilin koıaıyq dep edik.Sizden ruqsat alsaq degen nıetpen kelip otyrmyn, dep edim apam sondaı rıza boldy. Aınalaıyn, árıne qoıyńdar. Oǵan men nege qarsy bolýym kerek?! Men syrtta júrsem de osy Taldyqorǵan teatyryna ózim tileýles bolyp júremin. Senderdiń barlyq shyǵarmashylyqtaryńdy qadaǵalap júremin, dep  óziniń bir analiq jaqsy sózderin aıtyp ótti»,deıdi teatr jáne kıno akteri Saǵyndyq Jumadil.

Bıken Rımova ómiriniń 60 jylyn teatr ónerine arnady. Sahnada 80-ge jýyq keıipkerdi asqan sheberlikpen somdap shyqty. 20 dan astam fılmge túsip, qazaq kınoındýstrııasynyń damýyna ólsheýsiz eńbek sińirdi. Ol myqty dramatýrg retinde de moıyndalǵan tulǵa. Qalamynan týyndaǵan "Abaı-Áıgerim" jáne "Qos muńlyq" pesasy kórermenderdiń súıikti týyndylarynyń biri.  Sońǵysy oblystyq teatrda 9 jyldan beri qoıylyp keledi.