Qazaqstannyń halyq ártisi Baqyt Áshimova 75 jasqa qaraǵan shaǵynda ómirden ozdy

Bul týraly «Egemen Qazaqstan» gazeti QR Mádenıet jáne aqparat mınıstrligine silteme jasap habarlaıdy.

Baqyt Áshimovanyń shyǵarmashylyq ómiri 30 jyldan astam Abaı atyndaǵy Qazaq memlekettik akademııalyq opera jáne balet teatrymen tyǵyz baılanysta boldy. Baqyt Áshimova qazaq jáne shetel klassıkasynyń opera spektaklderinde kóptegen partııalardy oryndady. Onyń E.Brýsılovskııdiń «Qyz Jibek» operasyndaǵy Qamqa, A.Jubanov pen  L.Hamıdıdiń «Abaı» operasyndaǵy Qarlyǵash, B.Jumanııazovtyń «Mahambet» operasyndaǵy Fatıma, M.Tólebaevtyń «Birjan-Sara» operasyndaǵy Analyq, S.Muhamedjanovtyń «Aısulý» operasyndaǵy Nursulý, E.Rahmadıevtiń «Qamar sulý» operasyndaǵy Balym, P.Chaıkovskııdiń «Evgenıı Onegın» operasyndaǵy Larına men «Pıkovaıa dama» operasyndaǵy Polına, Dj.Pýchchınıdiń «Madam Batterflıaı» operasyndaǵy beıneleri shyǵarmashylyq qyzmetiniń shyrqaý shyńy boldy.

Baqyt Áshimova san qyrly talant ıesi edi. Ol óziniń kontserttik qyzmetimen de, radıoda oryndaǵan tamasha ánderimen de halyqqa keń tanyldy. Sondaı-aq, ol qazaq kompozıtorlarynyń ánderi men romanstaryn sheber oryndap otandyq án  óneri mektebiniń ýákili degen ataqqa ıe boldy.

Qurmetti demalysqa shyqqannan keıin Baqyt Áshimova óziniń shyǵarmashylyq qyzmetin Abaı atyndaǵy Qazaq memlekettik opera jáne balet teatrynda repetıtor-ustaz retinde jalǵastyrdy.

Qazaq mýzyka óneriniń damýyna sińirgen zor eńbegi úshin Baqyt Áshimova Qazaqstannyń halyq ártisi degen qurmetti ataqqa ıe boldy.

Baqyt Áshimovanyń jarqyn beınesi qazaqstandyqtardyń jadynda árqashan saqtalady.