Qazaqstannyń halyq ártisi ataǵy qalpyna keltirildi – marapat Respýblıka kúni beriledi

ASTANA. QazAqparat – Bıyl Respýblıka kúninde mádenıet qaıratkerleri «Qazaqstannyń halyq ártisi» ataǵymen marapattalady. Bul týraly Memleket basshysy Qasym-Jomart Toqaev VIII saılanǵan QR Parlamentiniń birinshi sessııasynda aıtty, dep habarlaıdy QazAqparat tilshisi.

«Taǵy bir mańyzdy másele bar. Mádenıet salasyndaǵy saıasatty jan-jaqty oılastyryp júrgizý kerek. Qazir bul salany órkendetý úshin jańa tujyrymdama jasalyp jatyr. Bul qujat elimizdiń mádenı murasyn saqtaý, nasıhattaý jáne ulttyq biregeılikti nyǵaıtý isinde sheshýshi ról atqarady dep senemin. Shyǵarmashyl zııaly qaýym kópshiliktiń kóńilinen shyǵatyn, memlekettiń múddesine saı keletin týyndylar usynady dep úmittenemin», - dedi Qasym-Jomart Toqaev.

Osy rette, Prezıdent kreatıvti ındýstrııaǵa júıeli qoldaý kórsetý óte mańyzdy ekenin aıtty.

«Adam kapıtalyn turaqty damytý jyldam ózgerip jatqan qazirgi álemde tabysty el bolýdyń basty kepili bolady dep sanaımyn. Biz ulttyń jańa sapasyn qalyptastyrý arqyly ádiletti memlekettiń jáne úılesimdi qoǵamnyń negizin qalaımyz. Men «Qazaqstannyń halyq ártisi» ataǵyn qaıta qalpyna keltirý týraly sheshim qabyldadym. Bıyl qazan aıynda – Respýblıka kúninde osy ataqqa laıyqty mádenıet qaıratkerleriniń alǵashqy toby marapattalady», - dedi Memleket basshysy.