Qazaqstannyń ǵylymı-kópshilik ádebıetiniń altyn qory taǵy bir kitappen tolyqty
ASTANA. Sáýirdiń 15-i. QazAqparat - Qazaqstannyń ǵylymı-kópshilik ádebıetiniń altyn qory taǵy bir kitappen tolyǵyp otyr. Ol Parlament Senatynyń depýtaty Ómirbek Baıgeldıdiń «Elibaı» kitaby boldy.
«Qazaqparat» baspasy shyǵarǵan jınaq taıaýda Astanada ótken «BookExpoAstana» halyqaralyq kitap jármeńkesinde «Eń úzdik ǵylymı-kópshilik ádebıet» atalymy boıynsha arnaıy dıplommen marapattaldy.
Kitaptyń polıgrafııalyq ásemdelýi de arnaıy dıplommen atalyp ótildi. Ol bizdiń elimizdegi baspagerler konkýrsy men 2009 jyly Ashgabadta ótken halyqaralyq kórmede birinshi oryndy jeńip aldy.
Tań zamanynda ómir súrgen qytaıdyń uly aqyny Lı Bonyń qazaq jerinde dúnıege kelýi jónindegi boljam boıynsha derekter izdestirýdi maqsat etken QHR-ǵa ekspedıtsııa kezinde jınaqtalǵan mol zertteý málimetteri shyǵarmanyń jáne «Tabylmaı kelgen qazyna» derekti fılminiń negizin qurady.
Aıtýly aqyn týraly kitap pen derekti fılmniń tusaýkeseri ótken jyly Astanadaǵy Prezıdenttik mádenıet ortalyǵynda ótken bolatyn. «Elibaı» kitabymen tanysý otandyq tarıhtyń buralańdaryn tereń túsinýge, Qazaqstan-Qytaı mádenı-gýmanıtarlyq baılanystaryn odan ári damytýǵa járdemdeseri daýsyz.
QHR-da aqynnyń bizdiń elimizdiń oqyrmandaryna belgisiz shyǵarmashylyq muralaryn zertteý jónindegi jıyrmaǵa jýyq qorlar bar. Ekinshi bóliginde qazaqshaǵa aýdarylǵan Lı Bonyń túpnusqa mátinderi berilgen basylym elimizdiń basty kitaphanalarynyń qoryna jiberildi.
