Qazaqstannyń Grekııadaǵy elshisi eldegi prezıdent saılaýy jaıly aıtyp berdi

NUR-SULTAN. QazAqparat - Qazaqstannyń Grekııadaǵy Elshisi Alekseı Volkov Grekııanyń ǵylymı, dıplomatııalyq jáne saıası toptary, sonymen qatar BAQ aldynda QR Tuńǵysh Prezıdenti Nursultan Nazarbaevtyń jahandyq bastamalary, zamanaýı halyqaralyq qatynastaǵy ózekti máseleler, sonymen birge 9 maýsymda ótetin kezekten tys prezıdent saılaýyna daıyndyq týraly baıandama jasady. Bul týraly Grekııadaǵy Qazaqstan elshiligine silteme jasap QazAqparat habarlaıdy.

Qazaqstan elshisi óz baıandamasynda Tuńǵysh Prezıdent Nursultan Nazarbaevtyń jańa formatsııadaǵy saıasatkerler men basshylarǵa jol berý maqsatynda otstavkaǵa ketý jóninde sheshim qabyldaǵany jaıly habardar etti. Osyǵan oraı, Qazaqstanda kezekten tys prezıdent saılaýy ótetinin aıtty. Bul kezekte, Alekseı Volkov «qazirgi Prezıdent Qasym-Jomart Toqaev saılaý demokratııalyq qaǵıdalarǵa sáıkes ashyq jáne ádiletti ótetindigine myzǵymas kepildik bergenin» aıryqsha atap ótti.

Halyqaralyq baqylaýshylarǵa kelgende, elshi EQYU men sheteldik BAQ-tyń 350 ókilin qosqanda, túrli halyqaralyq jáne aımaqtyq uıymdardan 700-ge jýyq baqylaýshy shaqyrylǵanyn jetkizdi. Osy oraıda Alekseı Volkov prezıdenttik dodaǵa jalpy 7 kandıdat qatysyp jatqanyn málimdedi.

Memleketimizdiń syrtqy saıasattaǵy baǵytynyń myzǵymastyǵyna toqtalǵan otandyq dıplomat:

«Elimiz demokratııalyq damý, memleket pen azamattyq qoǵamdy qurýda mańyzdy belesten ótý kezeńinde. Soǵan qaramastan, bul únqatysý, beıbitshilik pen qaýipsizdikke jol tabý sekildi qazaqstandyq dıplomatııanyń negizgi qaǵıdalaryna esh áser etpeıdi», - dedi.