Qazaqstannyń gaz salasyna jáne gazben qamtamasyz etýge qatysty arnaıy zań qabyldaý kerek- E. Imanqulov
ASTANA. Qańtardyń 15-i. QazAqparat /Qanat Mámetqazyuly/ - Gaz salasyna jáne gazben qamtamasyz etýge qatysty arnaıy zań qabyldaý qajet. Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Edilbaı Imanqulov osylaı málim etti,
dep habarlaıdy QazAqparat.
«Ótken jyly Úkimetke elimizdi gazdandyrý týraly jańa baǵdarlama jasaý qajettigin, onyń ishinde avtonomdyq suıytylǵan gazbenen qamtýdy aıtyp, depýtattyq saýal joldaǵan edik. Bizdi alǵan jaýabymyz qanaǵattandyrmady. Durysyn aıtqanda, bul máselege «aýyldyq jerler dástúrli otyndaryn jaǵyp otyra bersin» degenge saıatyn jaýap aldyq. Jalpy, gazǵa suranys halyqaralyq turǵydan alǵanda da turaqty ósip otyr, aldaǵy ýaqytta da suranys qarqyny arta túsetini boljanady. Degenmen de, Qazaqstannyń gaz salasynda problemalar kóp. Máselen, Úkimet tapsyrmasymen 2010 jyly Aqmola oblysyn gazdandyrý ilki jaǵdaıda júrgizilýi tıis bolatyn. Biraq, ondaı betburys baıqalmaıdy. Atap óterligi, bundaı jobanyń tıimdiligi mol bolatyn edi. Óıtkeni, bul - bıznes, ári osy salaǵa qarjy salǵysy keletinder kóp. Sondyqtan da, Senat komıtetinde talqylaı kele máseleni osylaısha qaldyrýǵa bolmaıdy dep sheshtik», dedi senator.
Osyǵan oraı, depýtat gaz jáne gazben qamtamasyz etý týraly arnaıy zań qabyldaý qajettigin alǵa rattty. «Senattyń Ekonomıkalyq jáne óńirlik damý komıteti 2010 jylǵy Úkimettiń zań shyǵarý josparyna gaz máselesine arnalǵan arnaıy zań jobasyn engizýdi suraıdy», dedi senator. Depýtattyń sózine qaraǵanda, bundaı zańdy qabyldaý arqyly qazaqstandyq gaz magıstrali boıynsha tasymaldanatyn gazdardy retteý sharalary da qamtylatyn bolady. Budan basqa, gaz jetkizýshiler arasynda, kondomınımým sýbektileri men jeke úı ıeleri arasyndaǵy qatynastar, sondaı-aq esepteýishi joq nysandar úshin gaz tutyný normatıvteri zańdyq retteýdi qajet etedi. Toqtala ketetin jaıt, gaz jáne gazben qamtamasyz etý týraly arnaıy zań Reseıde, AQSh-ta, Norvegııa men Frantsııada, Ulybrıtanııada jáne basqa da memleketterde bar kórinedi.
