Qazaqstannyń fýtbol qurama komandasynyń Belgııamen jáne Germanııamen oıyndaryna bıletter qazannyń 5-inen bastap satylady
ASTANA. Qazannyń 4-i. QazAqparat /Gúlmıra Álıakparova/ - Fýtboldan Eýropa chempıonatyna irikteý matchtary aıasynda ótetin Qazaqstan-Belgııa jáne Qazaqstan-Germanııa oıyndaryna bıletter erteń,
qazannyń 5-inen bastap satylady. Bul týraly QazAqparat tilshisine bergen suhbatynda Qazaqstan Fýtbol federatsııasynyń Atqarýshy dırektory Álııa Dúısekeeva aıtty.
Buǵan deıin habarlanǵandaı, Qazaqstan quramasy 2012 jylǵy Eýropa chempıonatyna irikteý týrnıri aıasyndaǵy kezekti matchtaryn elordadaǵy «Astana-Arena» stadıonynda qazannyń 8-i kúni en Belgııamen(bastalýy saǵat 22.00-de), al qazannyń 12-si kúni Germanııamen (23.00) ótkizedi.
Oıyndarǵa bıletter Astanadaǵy «Astana-Arena» stadıonynyń kassalarynda jáne Almatyda «Business and Sport Travel» kompanııasynyń keńsesinde satylady. Sondaı-aq olarǵa www.zakazbiletov.kz tapsyrys berýge bolady.
Bıletterdiń quny Qazaqstan-Belgııa oıyndaryna 1 myńnan 7 myń teńge aralyǵynda, al Qazaqstan-Germanııa matchyna 2 myńnan 15 myń teńgege deıin.
Á.Dúısekeevanyń aıtýynsha, belgııalyqtarmen bolatyn oıynǵa shet elderden basym quramy resmı delegatsııa men demeýshilerden quralǵan barlyǵy 150 adam keledi. Al Qazaqstan men Germanııa matchyn tamashalaýǵa resmı delegatsııadan bólek, 380 jankúıer kelmek.
Oıyndar basynan aıaǵyna deıin «Habar» telearnasynan tikeleı efır arqyly kórsetiledi.
Qazaqstan Fýtbol federatsııasynyń qoǵammen baılanys departamentiniń dırektory Izmaıl Bzarov atap kórsetkendeı, matchtardyń tym kesh ýaqytta ótkizilýi - ÝEFA talaptarynyń oryndalýy bolyp tabylady. Qazaqstan 8 jyl buryn Azııa konfederatsııasynyń quramynan ÝEFA-ǵa ótken kezde, oıyndardy televızııalyq túsirip taratý týraly talaptarǵa qosylýǵa kelisim bergen. Mysalǵa, Eýropada matchtar ortasha eýropalyq ýaqyt boıynsha shamamen 19.30 ne bolmasa 20.30-da ótedi. Ýaqyt aıyrmasyn eskere kele, Qazaqstanda bul ýaqytqa qosymsha 4 saǵat qosylady.
