Qazaqstannyń farmatsevtıkalyq ónimi básekege qabiletti - «Romat» kompanııasy
Bul týraly búgin Astanada bastalǵan «Qazaqstan Respýblıkasynyń ónerkásibin jańǵyrtý» taqyrybyndaǵy ǵylymı-praktıkalyq konferentsııa aıasynda jýrnalısterge suhbat bergen «Romat» farmatsevtıkalyq kompanııasynyń prezıdenti Turarbek Raqysh málim etti.
Onyń habarlaýynsha, Qazaqstannyń farmatsevtıkalyq jáne medıtsınalyq salasyn damytý baǵdarlamasyna sáıkes 2015 jylǵa deıin farmatsevtıkalyq ónim salasyndaǵy ulttyq mólsherdi 50 paıyzǵa deıin jetkizý mindeti qoıylǵan. Osy maqsatqa jetý úshin medıtsınalyq preparattardy shyǵaratyn jańa zaýyttardy salyp, eski óndiristerdi qaıta jańǵyrtý josparlanyp otyr. «Eger 1992 jylda farmatsevtıkalyq ónim salasyndaǵy qazaqstandyq mólsher 3-aq paıyz bolsa, 2010 jylda onyń deńgeıi 16 paıyzǵa ósti. Al búginde otandyq farmatsevtıka salasynda qolǵa alynǵan is-sharalardy eskeretin bolsaq, 2015 jyly farmatsevtıkalyq ónim salasyndaǵy ulttyq mólsherdiń kólemi 50 paıyzǵa deıin jetedi dep nyq senimmen aıtýǵa bolady», - deıdi T.Raqysh.
Kompanııa basshysy málim etkendeı, 50 paıyzdyq ulttyq mólsherdiń qarjylyq jaǵy 500 mln. dollar. Aldaǵy ýaqytta iske qosylatyn jańa zaýyttardyń kúshimen «Romat» kompanııasy 200 mln. dollardyń farmatsevtıkalyq ónimin shyǵarýdy josparlap otyr. «Keden odaǵy aıasynda biz ónimniń 30 paıyzyn eksportqa shyǵarýdy josparlap otyrmyz. 20 jyldyq tájirıbeniń arqasynda biz básekeles sheteldik kompanııalardyń ónimin jaqsy bilemiz. Sondyqtan ózimiz shyǵaratyn ónimniń básekege tolyq qabiletti ekendigine kepildik beremiz», - dep atap kórsetti T.Raqysh.
