Qazaqstannyń farmatsevtıkalyq naryǵy 1 mlrd. dollar shamasynda qalyptasyp otyr - V. Zverkov
ASTANA. Mamyrdyń 25-i. QazAqparat /Qanat Mámetqazyuly/ - Qazaqstannyń farmatsevtıkalyq naryǵy 1 mlrd. dollar shamasynda qalyptasyp otyr. Bul týraly búgin QR Parlamenti Senaty Áleýmettik-mádenı damý komıtetiniń múshelerimen kezdesýi barysynda «Samuryq-Qazyna Farmatsııa» JShS-niń Bas dırektory Vadım Zverkov málim etti,
dep habarlaıdy QazAqparat.
«Búgingi kúni qazaqstandyq farmatsevtıkalyq naryq shamamen 1 mlrd. dollardy quraıdy. Bunyń ishinde 400 mln. dollarǵa jýyǵy tegin medıtsınalyq kómektiń kepildendirilgen mólsheri aıasynda memleket tarapynan satyp alýlarǵa jatady. Al qalǵan 600 mln. dollarǵa jýyǵy kommertsııalyq naryq bolyp tabylady», dedi JShS dırektory.
Onyń aıtýynsha, sońǵy jyldary bul sala jetkilikti deńgeıde damyp keledi. Degenmen, V. Zverkovtyń sózine qaraǵanda, elimizdiń barlyq aımaǵyndaǵy dári baǵasyna qatysty teńgerimsizdik oryn alǵan. Bundaı teńgerimsizdik ásirese dárihanalyq segmentte áli kúnge saqtalyp otyr.
