Qazaqstannyń «Eýrovıdenıe» ánder baıqaýyna qatysýǵa múmkindigi bar
ASTANA. 5 qazan. QazAqparat - «Qazmedıa ortalyǵy» Basqarýshy kompanııasy» JShS basshylyǵy Qazaqstannyń Eýropalyq habar taratý odaǵyna kirýi úshin kelissózder júrgizýde.
Sonymen qatar, «Qazmedıa ortalyǵynyń» Azııalyq-Tunyq muhıttyq habar taratý odaǵyna kirýi jónindegi sheshim de kútilip otyr. Bul týraly JShS baspasóz ortalyǵy habarlaıdy.
Bul Qazaqstannyń álemdegi eń bedeldi estradalyq konkýrs bolyp sanalatyn «Eýrovıdenıege» qatysýyna múmkindik beredi. Bul másele kópten beri talqylanyp keledi, alaıda Eýropalyq habar taratý odaǵynyń qoıatyn talaptary tym joǵary bolǵandyqtan, múmkin bolmaı kelgen edi. Odaqtyń múshesi, eń aldymen sol odaqtyń qyzmetterin belsendi túrde paıdalanýy tıis, ekinshiden, iri sharalardy translıatsııalaý úshin qymbat turatyn taratý quqyǵyn júıeli túrde satyp alyp otyrýy qajet, úshinshiden, ózinde zamanaýı tehnıkalyq bazasy bolýy kerek. Eger de shara osy elde ótse, onda ol túsirý jáne translıatsııalaý jumystaryn joǵary deńgeıde uıymdastyryp, osy ispetti sharalardy taratý boıynsha tájirıbesi bolýy shart. Sonymen qatar, turaqty túrde tólep turatyn múshelik jarna taǵy bar. Al osy Eýropalyq habar taratý odaǵyna turaqty múshelik qana «Eýrovıdenıege» qatysýdy qamtamasyz ete alady.
Mundaı múmkindikter qazaqstandyq telearnalardy buryn bolmaǵan edi. «Búginde Qazaqstannyń Eýropalyq habar taratý odaǵyna múshelikke ený jumystary júrgizilip jatyr. Bul tek álemdik standarttarǵa jaýap beretin tehnıkalyq bazamen jabdyqtalǵan «Qazmedıa ortalyǵy» teleradıokesheniniń ashylýynan soń múmkin bolyp otyr. Osy arqyly qazaqstandyq medıa naryq álemge jar salatyn bolady», - deıdi kompanııanyń halyqaralyq bóliminiń bastyǵy Janar Shalbaeva.
