Qazaqstannyń et ónimderi Túrkııaǵa eksporttalmaq

ASTANA. QazAqparat - Túrkııa Respýblıkasy Qazaqstan Respýblıkasynda óndirilgen etterdi ımporttaýǵa daıyn ekenin málimdedi, dep habarlaıdy «QazAqparat» HAA QR Syrtqy ister mınıstrliginiń baspasóz qyzmetine silteme jasap.

«Túrkııa Qazaqstannyń et óniminiń sapasyn joǵary baǵalaıdy. Qazaqstannyń et ónimi elde úlken suranysqa ıe bolatynyna senimdimin», - dedi Túrkııa ekonomıka mınıstri Nıhat Zeıbekchı Qazaqstannyń TR-daǵy elshisi Abzal Saparbekulymen kezdesýde.

Mınıstr Qazaqstan men Túrkııa basshylary arasyndaǵy ekijaqty kelisimderdiń mańyzdylyǵyn atap ótip, qazaqstandyq ónimdi Túrkııaǵa ımporttaýǵa daıyn ekendigin jetkizdi.

Óz kezeginde Elshi Qazaqstandaǵy et óndirisiniń áleýeti, Qazaqstandaǵy bıdaıdyń kólemi týraly aıtyp, Túrkııaǵa astyq eksporttaý múmkindigine basa nazar aýdardy.

Kezdesýde taraptar aýyl sharýashylyǵyna, sonyń ishinde Qazaqstandaǵy mal sharýashylyǵy sektoryna túrik ınvestıtsııalaryn tartýǵa, Qazaqstannyń aýyl sharýashylyǵy ónimderin Túrkııaǵa eksporttaýǵa qatysty máselelerdi zerdeledi.

Sondaı-aq, eki el arasyndaǵy saýda-ekonomıkalyq yntymaqtastyqty damytý aıasynda ózara qarym-qatynas týraly, sondaı-aq ekonomıkalyq saladaǵy vedomstvoaralyq jumys toptaryn jandandyrý jaıly kelisildi.