«Qazaqstannyń et odaǵy» maldy tirideı eksporttaýǵa qatysty pikir bildirdi
«Maldy tirideı eksporttaýǵa shekteý qoıýdyń bir sebebi – ishki naryqta ettiń baǵasyn tómendetý tapsyrmasyn oryndaý. Alaıda bul jaǵdaı ishki naryq deńgeıine eshqandaı yqpal etpeıdi. Eger osy qujat júzege asyp, maldy tirideı eksporttaýǵa shekteý qoıylsa, baǵa tómendemeıdi, tek deldaldardyń tabysy arta túsedi», - dedi Asyljan Mamytbekov tilshilerge bergen jaýabynda.
Onyń aıtýynsha, ótken jyly Qazaqstannan 160 myń bas iri qara shyǵarylǵan.
«Et naryǵy zańdastyrylmaǵan. Kóp nárse, onyń ishinde mal bordaqylaý oryndary kóleńkede qalyp otyr. Mal ıesinen tutynýshyǵa deıin zertteseńiz, etti satyp alyp, qaıta satatyndar kóp. Salyqtyq júıe jetildirilmegen. Kóleńkede saýda jasaýdyń yńǵaılyraq bolatyny sondyqtan. Eksportty shektep tastamaı, osy baǵyttaǵy máselelerdiń bárin retke keltirý kerek. Maldyń tirideı satylyp ketýi – onyń baǵasyna oń áserin tıgizip otyr. Alaıda bul jaǵdaı dúkendegi taýar baǵasyna eshqandaı áser etpeıdi», - dedi et odaǵynyń basshysy.
Asyljan Mamytbekov ımportqa qatysty pikirin bildirdi.
«Import týraly sóz qozǵaǵanda AQSh, Kanada sekildi memleketter ónimdi eksporttaǵan deńgeıden kem ımporttamaıdy. Ol jaqta ımporttalǵan et qaıta óńdeledi. Al óziniń qymbat ónimin ol elder eksporttaýdy jolǵa qoıǵan», - dedi Asyljan Mamytbekov.
Aıta ketsek, jaqynda ǵana Qazaqstanda tiri maldyń eksportyna tyıym salynǵan bolatyn.