Qazaqstannyń erler quramasy Devıs kýbogynyń jańarǵan reıtinginde 10 orynǵa turaqtady
ASTANA. 21 qyrkúıek. QazAqparat - Devıs kýbogynyń jańartylǵan reıtınginde 1 saty joǵaltyp, 10 orynǵa jaıǵasty, dep habarlady QR Tennıs federatsııasynyń baspasóz qyzmetinen.
Jańa reıtıngte Qazaqstan quramasyn basyp ozǵan Horvatııa quramasy 12 orynnan 7-shi orynǵa joǵarylady. Reıtıngte Ispanııa quramasy kósh basynda. Odan keıingi oryndarda Serbııa men Argentına quramalary tur.
Esterińizge sala keteıik, ótken jyly Qazaqstan quramasy jersharynyń 16 úzdik quramasy qataryna ený úshin elordada ótkizilgen oıynda Shveıtsarııa quramasyn 5:0 esebimen utyp, óz tarıhynda alǵash ret álemdik topqa engen bolatyn.
Aǵymdaǵy jyly qazaqstandyq tennısshiler Chehııa komandasyn 3-2 esebimen utyp álemdik toptaǵy ustanymyn nyǵaıta tústi. Al Devıs kýbogy matchynyń shırek fınalynda Qazaqstan quramasy Argentınaǵa ese jiberdi.
