Qazaqstannyń erkin aıyrbas baǵamyna kóshýi jaqsy sheshim boldy - HVQ
ASTANA. QazAqparat - Qysqa merzimdi perspektıvada jahandyq daǵdarystyń yqpalyn azaıtý úshin Qazaqstannyń erkin aıyrbas baǵamyna kóshý sheshimi durys boldy. Bul týraly búgin Astana ekonomıkalyq forýmynyń plenarlyq otyrysynda beıne-joldaý arqyly Halyqaralyq valıýta qorynyń dırektory - basqarýshysy Krıstın Lagard málim etti.
Onyń sózine qaraǵanda, qazirgi kezde Ortalyq Azııa elderi úshin tómen bırjalyq baǵaǵa, ekonomıkanyń tómen ósimine baılanysty belgili bir qıyndyqtar bar. Osy rette bul máselelerdi sheshýmen qatar, turaqty ósimdi qamtamasyz etýge talpyný kerek.
«Bizdiń oıymyzsha, bul turǵyda belgili bir jaqsy ádister bar. Bul tásilder búginde iske asyryldy, onyń ishinde monetarlyq saıasatqa qatysty bolyp otyr. Sondyqtan da keıbir elder ózderiniń aıyrbas baǵamyn ıkemdi etti. Qazaqstan óziniń valıýtasyn erkin baǵamǵa jiberý sheshimin jasady. Bul óz kezeginde qysqa merzimdi perspektıvada syn-qaterlerdi azaıtyp, belgili bir ıkemdilikke qol jetkizý úshin jaqsy sheshim boldy dep esepteımiz»,-dedi ol.
Sonymen qatar K. Lagard monetarlyq saıasat qarjylyq sektorda belgili bir álsizdikti aıqyndady. Osy oraıda ol qysqa merzimdi perspektıvada prýdentsıaldyq sharalar men qarjylyq sýpervaızerlik qyzmetti qoldanýǵa keńes berdi. Bul qadamdar eleýli ilgerileýshilikke kómektesedi.
Al orta jáne uzaq merzimdi saıasatqa toqtalsaq, Ortalyq Azııanyń árbir eli dıversıfıkatsııaǵa kóbirek talpynyp, turaqty ósimniń ádisterin izdestirýi tıis.
«Munymen qosa, sheteldik ınvestorlardyń qatysýy úshin ekonomıkanyń ashyqtyǵyn arttyrý paıdaly bolar edi»,-dedi K. Lagard.
