Qazaqstannyń EO ınstıtýttarymen yntymaqtastyqty damytý perspektıvalary talqylandy
NUR-SULTAN. QazAqparat - Eýropalyq Odaq ınstıtýttarymen yntymaqtastyqty damytý perspektıvalary Qazaqstan Respýblıkasy Syrtqy ister mınıstriniń orynbasary Roman Vasılenkonyń Qazaqstanǵa eki kúndik tanysý saparmen kelgen EO Keńesiniń Shyǵys Eýropa jáne Ortalyq Azııa boıynsha jumys tobynyń (COEST) ókilderimen kezdesýinde talqylandy. Bul týraly QR SІM baspasóz qyzmeti habarlady.
R.Vasılenko eýropalyq delegatsııaǵa Qazaqstanǵa qyzyǵýshylyq tanytqany úshin alǵysyn bildire otyryp, EO ınstıtýttarymen turaqty baılanystardy qoldaýdyń, atap aıtqanda, Eýroodaqtyń Ortalyq Azııa boıynsha jalpy saıasatyn qalyptastyratyn mańyzdy ortalyqtarynyń biri retinde jumys tobynyń mańyzdylyǵyn atap ótti.
Áńgime barysynda SІM basshysynyń orynbasary Eýropalyq Odaq Qazaqstan úshin ekijaqty tyǵyz qarym-qatynas ornatylǵan senimdi saıası, saýda-ekonomıkalyq jáne ınvestıtsııalyq seriktesi bolyp tabylatynyn atap ótti. Birneshe jyl boıy EO Qazaqstannyń saýda jáne ınvestıtsııalyq seriktesteri arasynda kóshbasshylyqty saqtap, eldiń jalpy taýar aınalymy kóleminiń shamamen 50%-yn ıelenetindigi, sondaı-aq respýblıka ekonomıkasyna tartylǵan sheteldik tikeleı ınvestıtsııalardyń jarty kóleminiń kózi bolyp tabylatyny atap ótildi.
Sonymen qatar, QR SІM basshysynyń orynbasary QR men EO arasyndaǵy Keńeıtilgen áriptestik pen yntymaqtastyq týraly Kelisimniń kúshine enýi qarsańynda ekijaqty formatta, sondaı-aq Ortalyq Azııa boıynsha EO-nyń qabyldanǵan jańa strategııasy aıasynda kópjaqty formatta Eýroodaqpen yntymaqtastyqty odan ári damytý boıynsha Qazaqstannyń negizgi basymdyqtaryn atap ótti.
Osy oraıda taraptardyń jeke nazary Eýroodaq tarapynan QR azamattary úshin vızalyq rejımdi jeńildetýge, Qazaqstan aýyl sharýashylyǵy ónimderin EO elderiniń naryǵyna eksporttaý úshin saýda kedergilerin joıýǵa jáne t.b. máselelerine aýdaryldy.
Eýropalyq dıplomattar osy jyly QR Prezıdenti Qasym-Jomart Toqaevtyń bastamasymen iske qosylǵan saıası jáne áleýmettik reformalarǵa, sonyń ishinde Ulttyq qoǵamdyq senim keńesi men azamattyq qoǵammen ózara is-qımyldyń jańa paradıgmasyn qurýǵa joǵary baǵa berdi.
Óz kezeginde, Jumys tobynyń basshysy ıÝtta Edhofer bizdiń elimizdiń Eýropa elderimen saıası jáne saýda-ekonomıkalyq yntymaqtastyqty nyǵaıtýǵa qosqan úlesin joǵary baǵalady.
Kelissózder qorytyndysy boıynsha Taraptar EO men QR arasyndaǵy jáne EO men Ortalyq Azııa arasyndaǵy yntymaqtastyqtyń qolda bar áleýetin ashý maqsatynda turaqty jumys baılanystaryn qoldaýǵa ýaǵdalasty.
Nur-Sultan jáne Almaty qalalaryna sapary barysynda Eýropalyq dıplomattar Parlament Májilisiniń depýtattarymen, Bas prokýratýra, Saýda jáne ıntegratsııa, Ulttyq ekonomıka mınıstrlikteriniń basshylyǵymen jáne QR-daǵy Adam quqyqtary jónindegi Ýákilmen ekijaqty kezdesýler ótkizedi. Delegatsııa músheleri sondaı-aq «Astana» Halyqaralyq qarjy ortalyǵy men Halyqaralyq jasyl tehnologııalar ortalyǵynyń jumysymen tanysatyn bolady.
Aıta keteıik, EO Keńesiniń Shyǵys Eýropa jáne Ortalyq Azııa boıynsha Jumys toby (COEST) Eýropalyq komıssııa men EO-ǵa múshe memleketter arasyndaǵy baılanystyrýshy býyn rólin atqarady. Sondaı-aq, Ortalyq Azııa elderimen yntymaqtastyqtyń barlyq aspektileri boıynsha EK-niń jumysyn maquldaıdy jáne baǵyttaıdy.
COEST eki jaqty qujattardyń, kún tártibiniń jobalaryna jáne is-sharalardyń mazmundyq toltyrylýyna túzetýlerdi kelisedi jáne engizedi, EO negizgi ustanymdaryn bekitedi jáne tujyrymdaıdy, sondaı-aq OA óńirine qatysty EO Keńesiniń shetel isteri jónindegi qorytyndylarynyń jobalaryn daıyndaıdy. COEST quramyna EO-ǵa múshe 28 memlekettiń árbir turaqty ókildikterinen dıplomattar kiredi.
