Qazaqstannyń energııa júıeleri shtattyq rejimde istep tur - mınıstrlik

NUR-SULTAN. QazAqparat – Búgin Úkimet otyrysynda QR Energetıka birinshi vıtse-mınıstri Mahambet Dosmuhambetov elektr energetıkalyq júıeniń qysqy kezeńde daıyndyǵy týraly baıandady, dep habarlaıdy QazAqparat tilshisi.

«Tutastaı alǵanda, Qazaqstannyń Biryńǵaı elektr energetıkalyq júıesi Reseı Federatsııasy men Ortalyq Azııa elderiniń energııa júıelerimen qatar shtattyq rejimde jumys isteýde. 19 qyrkúıektegi jaǵdaı boıynsha respýblıka boıynsha elektr energııasyn tutyný 73,1 mlrd kVt/saǵ qurady, bul ótken jyldyń deńgeıinen 1,7 paıyz artyq. Energııa kásiporyndaryn kúzgi-qysqy kezeńge daıyndaý bekitilgen jóndeý kestelerine sáıkes júrgizilýde», - dedi M. Dosmuhambetov.

Onyń sózine qaraǵanda, búginde 5 energoblokqa jóndeý júrgizildi, bul jyldyq kólemniń 45 paıyzyn qamtyp otyr. Sonymen qatar, jóndelgen 40 qazandyq, bul jyldyq kólemniń 63 paıyzyn jáne 23 týrbına jyldyq kólemniń 50 paıyzyn qurady. Jóndeýdiń ártúrli kezeńindegi 4 energııa blogynda, 28 qazandyqta jáne 18 týrbınada jumystar júrgizilýde.

«Elektr jelileri boıynsha 21 myń shaqyrym elektr berý jelileri men 1 152 shaǵyn stansaǵa jóndeý júrgizildi, bul jyldyq jospardyń tıisinshe 84 paıyzyn jáne 92 paıyzyn quraıdy», - dep naqtylady ol.

Aldaǵy jylytý maýsymyna daıyndyq úshin ortalyqtandyrylǵan jylýmen qamtý aımaǵynda 459 qazandyqtyń 428 qazandyǵyna jóndeý júrgizildi, bul jyldyq jospardyń 93 paıyzyn qamtydy.

«Sonymen qatar, birqatar óńirlerde jóndeý kestesinde belgilengen merzimderdiń saqtalmaýy jáne artta qalýyn baıqalýda», - dedi M. Dosmuhambetov