Qazaqstannyń energııa jınaqtaýdaǵy áleýeti tutynýdyń jalpy deńgeıiniń 30 paıyzyn quraıdy
ALMATY. Qazannyń 8-i. QazAqparat /Erlik Erjanuly/ - Sáýlelidıodty qoldaný elektr energııasy shyǵyndaryn 80 paıyzǵa deıin qysqartýǵa múmkindik beredi. Bul keshe Almatyda ótken Royal Philips Electronics kompanııasynyń LED-týrynda aıtyldy.
Mamandar boljamyna qaraǵanda 2015 jyly álemdegi jaryqtandyrýdyń 50 paıyzy sáýlelidıodtary arqyly júzege asyrylady, Al 2020 jyldary ol 75 paıyzdan asady. Sáýlelidıodtar shamǵa qaraǵanda energııa az jumsaıdy jáne odan 30-40 ese uzaq qyzmet kórsetedi. Sonymen qatar onda jaryq sáýlesin rettep otyrýǵa da múmkindik bar. Halyqaralyq energetıkalyq agenttiktiń baǵalaýyna qaraǵanda jaryqtandyrýǵa álemde energııa tutynýdyń 19 paıyzy jumsalady. Qazirgi zamanǵy jaryqtyq tehnologııalar ony 40 paıyzǵa deıin únemdeýge múmkindik beredi. Qarjyǵa shaqqanda bul jylyna 106 mıllıard eýrony quraıdy. Al ekologııalyq turǵydan kelgende jylyna aýaǵa taralatyn kómirqyshqyl gazdardy 555 mıllıon tonnaǵa azaıtyp, 2 terravatt elektr energııasy men 1,5 mıllıard barrel munaıdy únemdeýmen para-par.
«Qazaqstannyń energııalyq tıimdi tehnologııaǵa aýysý esebinde sáýlelidıodty jaryqtandyrý eń perspektıvaly taqyryptardyń biri. LED-týr kásibı mamndardyń nazaryn onyń múmkindikterine aýdarýǵa shaqyrady. Bolashaqta jaryqtandyrdyń úlken bóligi sáýlelidıodtar arqyly júzege asyrylady. Ol qazirdiń ózinde sáýlet, meımanhana bıznesi, bólshek saýda jáne taǵy basqa da salalarda keńinen qoldanys taýyp jatyr», - deıdi kompanııanyń Reseı, Ýkraına, Belarýs, Túrkııa, Kavkaz jáne Ortalyq Azııa elderindegi vıtse-prezıdenti Vladımır Gabrıelıan.
«Energoprom» QazǴZI Prezıdenti Gennadıı Andreevtiń baǵalaýynsha, Qazaqstannyń energııa jınaqtaýdaǵy potentsıaly tutynýdyń jalpy deńgeıiniń 30 paıyzyn quraıdy. QR Indýstrııa jáne jańa tehnologııalar mınıstrligi 2012 jyly 100 vattyq, 2013 jyly - 75 vattyq, 2014 jyly 25 vattyq qyzý qýaty bar shamdardy qoldanýǵa shekteý engizýdi josparlap otyr. Qazirgi tańda onda osy máselege baılanysty arnaıy zań jobasy da ázirlenip jatyr.
