Qazaqstannyń energııa óndirýshi kompanııalary shekti tarıfti ózgertpek
«Qazaqstannyń elektr energetıkasy salasynda qoldanystaǵy aktıvterdi jańartý talap etiledi. 2019 jyly engizilgen elektr qýaty naryǵynyń arqasynda stantsııalardyń aktıvteri jańartyla bastady. Alaıda, boljamdy baǵalaýlar boıynsha elektr qýaty naryǵynan alynǵan kirister stantsııalardaǵy óziniń parktik resýrsyn paıdalanyp bolǵan jabdyqtardy tolyqqandy jańartýǵa jáne jańǵyrtýǵa múmkindik bermeıdi», - dep málim etti QR Energetıka mınıstrliginiń baspasóz qyzmetinen.
Stantsııalardyń tozý deńgeıi jyldan-jylǵa ulǵaıyp keledi. Bul elektrmen jabdyqtaý sapasyna da qaýip tóndiretin bolady.
Energııa óndirýshi uıymdardyń (EÓU) shekti tarıfteriniń qazirgi deńgeıi EÓU shyǵyndaryn tolyq jappaıdy. Sondyqtan stantsııalar elektr qýaty naryǵynan túsetin kiristiń bir bóligin aǵymdaǵy shyǵyndardy jabý úshin jumsaýǵa májbúr.
«Jabdyqtardyń shamamen 60% eskirgen. Bul fakt elektr qýatynyń jıi avarııalyq isten shyǵýy, tutynýshylardy elektrmen jabdyqtaý sapasynyń tómendeýi jaǵdaılarymen jáne Qazaqstannyń birtutas elektr energetıkasy júıesiniń kórshi elderge táýeldiligi qaýpiniń ulǵaıýymen rastalady.
2019 jyly qýattardyń eskirýine, manevrleýdiń jetkiliksizdigine jáne kóptegen avarııalyq jaǵdaılarǵa baılanysty Qazaqstan 8 mlrd teńgeden astam somaǵa elektr qýatyn retteý jónindegi kórsetiletin qyzmetti amalsyzdan kórshi elderden satyp aldy. Bul, aqyrynda, qazaqstandyqtardyń tarıfine teris áser etti», - deıdi mınıstrlikten.
Málim etilgendeı, osyndaı jaǵdaı odan ári saqtalsa, Qazaqstannyń energetıka salasynda stantsııalardy rekonstrýktsııalaý, jańǵyrtý jáne jańartý úshin paıdalanylýy múmkin aqsha qarajaty da kórshi elderge ketetin bolady.
«EÓU shekti tarıfteri ózgergen kezde, statıstıkalyq orta páterler boıynsha (elektr plıtasy bar páterlerdi eseptemegende, tutyný kólemi aıyna orta eseppen 170-220 kVtsaǵ bolatyn eki-úsh bólmeli páterler) túpkilikti tutynýshylar úshin elektr energııasyn tóleýge arnalǵan ortasha chek tórtinshi toqsannan erte emes merzimde aǵymdaǵy shottarǵa aıyna 200 teńgeden aspaıtyn mólsherge ulǵaıýy múmkin.
Óz kezeginde, elektr stantsııalaryn jańǵyrtýǵa arnalǵan ınvestıtsııa shamasyn tolyq paıdalaný múmkindigi saqtalady, ol aǵymdaǵy jyly 70 mlrd. astam teńgeni quraýy tıis.
Energııa óndirýshi uıymdardyń elektr energııasynyń baǵasy jetkizýshi men tutynýshy, sonyń ishinde energııamen jabdyqtaýshy uıymdar arasyndaǵy shartqa sáıkes belgilenedi. Biraq ol memlekettik organ belgilegen shekti tarıften joǵary bolmaıdy», - dedi vedomstvodan.
Elektr energııasyna arnalǵan tarıfter Zańǵa sáıkes 7 jylǵa belgilenedi. Bul rette, jyl saıyn elektr stantsııalarynda elektr energııasyn óndirý shyǵyndarynyń ósýi baıqalady. Energııa óndirýshi uıymdardyń elektr energııasyn óndirý shyǵyndary naqty ulǵaıǵan jaǵdaıda, EÓU ýákiletti organǵa shekti tarıfti túzetýge ótinim berýge quqyly.
2020 jyldyń basynan bastap EÓU-ǵa baılanysty emes shyǵyndar ulǵaıdy. Atap aıtqanda, otyndy (9,9%-ǵa ósim), jańartylatyn energııa kózderinen elektr energııasyn satyp alý boıynsha (JEK tarıfiniń 9,3%-ǵa ulǵaıýy, JEK elektr energııasyn mindetti túrde satyp alý kólemi eki esege artty); bıýdjetke mindetti tólemder (aılyq eseptik kórsetkishtiń ósýine baılanysty ulǵaıtý); júıelik operatordyń rettelip kórsetiletin qyzmetteri (12%-ǵa ósim) boıynsha shyǵyndar ulǵaıdy.
