«Qazaqstannyń eńbek sińirgen ustazy» marapatyn taǵaıyndaý ashyq bolýy tıis - Gúlshara Ábdiqalyqova
NUR-SULTAN. QazAqparat – «Qazaqstannyń eńbek sińirgen ustazy» marapatyn taǵaıyndaý sharalary barynsha ashyq júrgizilýi kerek. Bul týraly Qazaq ulttyq óner ýnıversıtetiniń ujymymen kezdesýinde Parlament Májilisi Áleýmettik-mádenı damý komıtetiniń tóraıymy Gúlshara Ábdiqalyqova málim etti, dep habarlaıdy QazAqparat tilshisi.
Júzdesý barysynda depýtat «Pedagog mártebesi týraly» Zańynyń negizgi jańashyldyqtary týraly aıtyp berdi. Sonymen qatar, «Qazaqstannyń eńbek sińirgen ustazy» marapatyn taǵaıyndaý sharalary týraly pikir almasý boldy. Bul turǵyda ýnıversıtet oqytýshylary atalǵan marapatty taǵaıyndaýda barynsha ashyqtyqty qamtamasyz etý qadamdaryn pysyqtaý kerektigin atap ótti.
«Osyndaı qurmetti ataqtar berilgende ashyqtyqty qamtamasyz etý kerek. Bul sharalarda barlyq kafedralar men dekanattar qamtylsa degen tilek bar. ıAǵnı laıyqty adamdy ózimiz aramyzdan saılasaq durys bolar edi», - dedi ýnıversıtet ustazy.
Óz kezeginde G. Ábdiqalyqova ashyqtyqty qamtamasyz etýde oqytýshylardyń usynystarymen kelisetinin aıtty.
«Jalpy, «Qazaqstannyń eńbek sińirgen ustazy» jáne «Jyl ustazy» degen túrli marapattaýlardy bergen kezde barlyq sharalar ashyq bolýy kerek. Qazirgi kezde Bilim jáne ǵylym mınıstrligi arnaıy ereje daıyndap jatyr. Osy oraıda sizdiń usynysyńyzdy eskerý kerektigin aıtamyz», - dedi depýtat.
Aıta keteıik, «Pedagog mártebesi týraly» Zańy boıynsha halyqaralyq konkýrsttar men jarystardyń jeńimpazdaryn, túrli olımpıadalar men sporttyq jarystardyń laýreattaryn daıarlaǵan pedagogterge 3 laýazymdyq jalaqyǵa deıin birjolǵy syıaqy tólenedi.
«Qazaqstannyń eńbek sińirgen ustazy» memlekettik marapat taǵaıyndalady jáne ıegerlerine 1000 AEK mólsherinde birjolǵy syıaqy beriledi.
