«Qazaqstannyń eńbek sińirgen ustazy» marapaty bekitilýi múmkin
ASTANA. QazAqparat - «Pedagogtar mártebesi týraly» zań jobasynyń tujyrymdamasyn daıyndaǵan jumys toby «Qazaqstannyń eńbek sińirgen ustazy» marapatyn bekitýdi usyndy, dep habarlaıdy QazAqparat tilshisi.
«Búgingi tańda pedagogtarǵa jáne pedagogıka salasyndaǵy qyzmetkerlerge (azamattyq) beriletin demalystar 56 jáne 42 kúnge sozylady. Bilim salasyndaǵy qyzmetkerler pedagogtar sekildi uzaqtaý demalysty almaıdy. Soǵan baılanysty pedagogtardyń barlyǵyna birdeı 56 kún jyldyq aqyly eńbek demalysyn berip, teńestirsek degen úmit bar», - dedi «Pedagogtar mártebesi týraly» zań jobasyn daıarlaýshy jumys tobynyń múshesi, Astana qalasynyń gýmanıtarlyq kolledjiniń dırektory Eldos Nurlanov BǴM-da ótken basqosýda.
Onyń aıtýynsha, búgingi tańda Bilim jáne ǵylym mınıstrliginiń birneshe kótermeleý túrleri bar. Máselen, «Qurmet» gramotasy, Alǵys hat, Bilim salasynyń qurmetti qyzmetkeri, Y.Altynsarın syılyǵy jáne Ǵylymnyń damýyna qosqan úlesi syılyqtary bar.
«Bizdiń oıymyzsha, «Qurmet» gramotasyn alǵan qyzmetkerlerden bastap, nagrada alǵan qyzmetkerlerge tósbelgi berip qana qoımaı, tıisti qarajatpen qýattalsa nur ústine nur bolar edi. Sol sekildi memlekettik nagradanyń qosymsha bir túrin qarastyrsa - «Qazaqstannyń eńbek sińirgen ustazy» degendeı ataq berýdi usynamyz. Ol bizdiń oıymyzsha, bul jaqsy usynys. Kórshi elderde mundaı nagrada túri bar. Sebebi, pedagog, dáriger, sýdıa sekildi qyzmetkerler qoǵamda asa úlken ról atqaratyndyqtan, mundaı marapatty qarastyrý oryndy», - deıdi Eldos Nurlanov.
Eske sala ketsek, Memleket basshysy Nursultan Nazarbaev Qazaqstan halqyna Joldaýynda 2019 jyly Qazaqstanda «Pedagogtardyń mártebesi» týraly Zań qabyldaý kerektigin aıtqan edi.
Aıta keterligi, BǴM-daǵy búgingi basqosýda zań jobasy boıynsha eńbek etip jatqan jumys toby muǵalimdi mindetinen tys jumysqa tartqandardy ákimshilik jaýapkershilikke tartýdy usyndy.
