«Qazaqstannyń eńbek sińirgen ustazy» atanǵan muǵalimder mektepti basqarý isine aralasady

ASTANA. QazAqparat – «Qazaqstannyń Eńbek eri», «Qazaqstannyń eńbek sińirgen ustazy» ataqtaryn alǵan muǵalimder mektepti basqarý máselelerine qatysady. Bul týraly QR Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.

«Bilim berý sapasyn jaqsartý maqsatynda «Qazaqstannyń eńbek eri», «Qazaqstannyń eńbek sińirgen ustazy» ataǵyn alǵan muǵalimder mektepti basqarý máselelerine qatysady. Oǵan qosa, bilim berýdegi táýelsiz kásibı sarapshylar ınstıtýtyn damytatyn bolamyz. Bul rette pedagogtyń joǵary mártebesi bilim sapasyn jaqsartýǵa qyzmet etedi», - dedi Ǵanı Beısembaev elordada ótken mınıstrliktiń alqa otyrysynda.

Sonymen birge, Prezıdent kadr rezervine uqsas bilim mekemeleri basshylyǵyna bolashaq kandıdattardyń respýblıkalyq derekqory qurylady.

«Bul shara bilim berý uıymdaryn bilikti basshylarmen qamtamasyz etýge múmkindik beredi. Sonymen qatar, pán muǵalimderiniń derekter bazasy qurylady, ol óńirlerdegi pedagog kadrlarynyń tapshylyǵyn joıýǵa kómektesedi. Budan basqa, bilim berý uıymdarynyń basshylarynyń jalaqysy kóbeıedi», - dedi Oqý-aǵartý mınıstri.