Qazaqstannyń eńbek sińirgen qaıratkeri Sádibek Túgeldiń shyǵarmashylyq keshi ótti

"Men úshin Sádibek Túgel eń aldymen jazýshy, sonymen qatar atbegilikti, qusbegilikti qalamgerlikpen qatar alyp júrgen Jazýshylar odaǵynyń bir sektsııasy ispetti. Іsker azamat, uıymdastyrýshylyq qabiletimen de erekshe kózge túsip júr", dep atap ótken jazýshy Ákim Tarazı onyń azamattyq kelbetine keńinen toqtaldy.

Sádibek Túgeldiń esimi halyq arasynda keńinen tanymal. Onyń bastamasymen "Astana - Kókshetaý" avtobanynyń boıynda Qulagerdiń alyp eskertkishi boı kótergen bolatyn.

55 jyldyq mereıtoıyna jáne shyǵarmashylyq jumystarynyń 35 jyldyǵyna arnalǵan eseptik kesh ıesi 2007 jyldan beri ózi uıymdastyrǵan "Qazanat" jýrnalyna basshylyq jasaıdy. Bul oraı S.Túgeldiń qoǵam arasynda qazanat uǵymynyń qalyptasýyna sińirgen ushan-teńiz eńbegin atap ótken de oryndy. Ol zerttep, taldap jazǵan "Qazanat" kitap-entsıklopedııasy Máskeýde ótken halyqaralyq baıqaýda TMD elderiniń úzdik kitaby, elimizde eń jaqsy basylym bolyp tanylǵan.

El ordasy Astanaǵa arnalǵan 8 kitaby jaryq kórgen jazýshy taıaý arada "Qulynym" atty balalarǵa arnalǵan jurnal shyǵarýdy qolǵa aldy.