Qazaqstannyń eńbek sińirgen qaıratkeri Maǵıra Qojahmetovanyń mereıtoıyna arnalǵan kesh ótedi
Maǵıra Qojahmetova 1946 jyly Kókshetaý oblysy, Zerendi aýdanyna qarasty Qoshqarbaı aýlynda dúnıege kelgen. Alǵashynda Kókshetaý kitaphana tehnıkýmyn bitirse, 1969 jyly Qazaq Memlekettik ýnıversıtetiniń jýrnalıstıka fakýltetin bitirgen.
Respýblıkalyq «Lenınshil jas» (qazirgi «Jas alash») gazetinde 1981 jylǵa deıin qyzmet istegen. 1981-1992 jj. «Qazaqstan áıelderi» jýrnalynda, 1992-1994 jj. «Densaýlyq» jýrnalynda, 1994-1996 jj. «Aı», 1996 jyldan «Aq jelken» jýrnalynda qyzmet etken. 2002 jyldan bastap balalarǵa arnalǵan «Balbulaq» jýrnalyn, 2005 jyldan beri kópshilikke arnalǵan medıtsınalyq, tanymdyq «Dertke daýa» gazetin shyǵaryp keledi.
«Kúnniń altyn synyǵy», «Álem-áýen», «Jyly shyraı», «Adam qupııa», «Jantásilim», «Japadan jalǵyz» kitaptarynyń, kóptegen tanymdyq materıaldardyń, shyǵarmashylyq portretterdiń avtory. 2006 jyly shyqqan Qazaqstannyń Halyq jazýshysy, aqyn Márııam Hakimjanovanyń ІІІ tomdyq shyǵarmalar jınaǵyn qurastyrǵan.
1982 jyly Qazaq KSR Joǵarǵy Keńesi Tóralqasynyń Qurmet gramotasymen, 2006 jyly «Eren eńbegi úshin» medalimen marapattalǵan. Halyqaralyq «Alash» ádebı syılyǵynyń laýreaty (2008). 2015 jyly «Qazaqstannyń eńbek sińirgen qaıratkeri» qurmetti ataǵyn aldy.
