Qazaqstannyń eńbek sińirgen qaıratkeri Ásel Mámbetovanyń benefıs-keshi ótedi
ALMATY. Mamyrdyń 8-i. QazAqparat /Erlik Erjanuly/ - Almatyda mamyrdyń 15-i kúni Qazaqstannyń eńbek sińirgen qaıratkeri, Memlekettik «Daryn» syılyǵynyń laýreaty, «Eren eńbegi úshin» medaliniń ıegeri Ásel Mámbetovanyń 50 jasqa tolý mereıtoıyna arnalǵan «Teatr - meniń taǵdyrym» dep atalatyn benefıs-keshi ótedi,
dep habarlaıdy QazAqparat.
Ony Qazaqtyń Ǵabıt Músirepov atyndaǵy memlekettik akademııalyq balalar men jasóspirimder teatry uıymdastyryp otyr. Ásel Mámbetova 1959 jyly tamyzdyń 9-y kúni Batys Qazaqstan oblysy, Aqjaıyq aýdanynda dúnıege keldi. 1977-1979 jyldary Abaı atyndaǵy opera jáne balet teatry janyndaǵy mýzykalyq stýdııany, 1979-1984 jyldary T. Júrgenov atyndaǵy Almaty memlekettik teatr jáne kórkemsýret ınstıtýtynyń teatr fakýltetiniń mýzykalyq-drama bólimin támamdap shyqty. Sol jyly Mádenıet mınıstrliginiń joldamasy boıynsha óner ordasyna aktrısa bolyp jumysqa alynǵan edi. 1990 jyldary «Tamasha» oıyn-saýyq otaýynda, 1996 jyly «Habar» tele-arnasynda júrgizýshi boldy. Іshki ister jáne Qorǵanys mınıstrlikteriniń ansamblderinde áskerı ánderdi oryndap, kontsertterinde júrgizýshi bolyp 5 jyldaı qyzmet etti. «Qazaqfılm» kınostýdııasynyń «Sońǵy kanıkýl» fılminde - Ana rólinde oınady. 2000 jyldan T. Júrgenov atyndaǵy Qazaq ulttyq óner akademııasynda, 2008 jyldan J. Elebekov atyndaǵy estrada jáne tsırk kolledjiniń stýdentterine sahna tili páninen dáris berip ustazdyq qyzmetti qosa atqaryp júr. Teatr sahnasyndaǵy jemisti qyzmeti men el mádenıetiniń órkendeýine qosqan eren eńbegi úshin Ásel Mámbetova 2009 jyly Prezıdent Jarlyǵymen «Qazaqstannyń eńbek sińirgen qaıratkeri» qurmetti ataǵyna ıe boldy.
