Qazaqstannyń eńbek sińirgen qaıratkeri, ánshi Rymkesh Jumadilova dúnıeden ótti
ASTANA. QazAqparat - Qazaq óneri orny tolmas qazaǵa ushyrady. Qazaq operasynyń maıtalmany, Qurmanǵazy atyndaǵy Qazaq ulttyq konservatorııasy Halyq áni kafedrasynyń oqytýshysy, Qazaqstannyń eńbek sińirgen qaıratkeri Rymkesh Áljanqyzy Jumadilova dúnıeden ótti, dep habarlaıdy QazAqparat.
Rymkesh Jumadilova zamana bulbuly Kúlásh Baıseıitova týǵan topyraqta, ıaǵnı Qaraǵandy oblysy Aqtoǵaı aýdanyna qarasty Qaramendi aýylynda 1957 jyly dúnıege keldi.
Ol Qurmanǵazy atyndaǵy Qazaq ulttyq konservatorııasynyń túlegi. Qazaqstannyń halyq ártisi Beken Jylysbaevtyń shákirti edi.
Rymkesh Áljanqyzynyń konservatorııany bitirgen soń birden Abaı atyndaǵy opera jáne balet teatryna ornalasty. Bul jas ánshige úlken jaýapkershilik artty. Ómiriniń otyz jylyn qazaq operasyna arnap, nebir sahna sheberlerimen qatar júrip sahnada sheberligin shyńdaǵan ol opera jáne kontserttik solısi qyzmet atqardy.
Rymkesh Jumadilova Evgenıı Brýsılovskııdiń «Er Tarǵynynda» - Aqjúnis, «Qyz Jibek» operasynda - Batsaı, Muqan Tólebaevtyń «Birjan-Sarasynda» - Sara men Altynaı, Bazarbaı Jumanııazovtyń «Mahambetinde» - Zylıha, Latıf Hamıdı men Ahmet Jubanovtyń «Abaıynda» - Ajar, Sydyq Muhamedjanovtyń «Aqan seri - Aqtoqtysynda» - Aqtoqty, Erkeǵalı Rahmadıevtyń «Abylaıhanynda» - Kúlpash, Jorj Bızeniń «Karmeninde» - Mıkaelanyń, Djakomo Pýchchınıdiń «Týrandot» operasynda - Lıýdyń, Djýzeppe Verdıdiń «Aıda» operasyndaǵy - Jrıtsa rolderin sheber somdady. Ulylardyń dástúrin jalǵastyryp, álemdik jáne ulttyq klassıkanyń qaıtalanbas keıipkerler galereıasyn jasady.
Rymkesh Jumadilova osy óneriniń arqasynda opera ujymymen Túrkııa, Qytaı, Baltyq jaǵalaýlaryna baryp óner kórsetti. Qazaqtyń Qurmanǵazy atyndaǵy halyq aspaptar orkestrimen Keńester Odaǵynyń, sondaı-aq qazaq jerin armansyz aralap, óz ónerin pash etip, sandýǵashtaı saırady, el qurmetine bólendi.
Rymkesh Jumadilovanyń Qazaq radıosynyń áýe tolqynynan jıi beriletin halyqtyń «Ahaý kerim», «Gúlderaıym», «Maýsymjan», Segiz seriniń «Gaýhar tas», Abaıdyń «Jelsiz túnde jaryq aı», Manarbek Erjanovtyń «Qýanamyn», Sydyq Muhamedjanovtyń «Terbeledi tyń dala», Nurǵısa Tilendıevtiń «Aq shaǵala», Іlııa Jaqanovtyń «Edil men Jaıyq» ánderi, sondaı-aq qazaq, orys jáne shetel romanstary týǵan halqynyń kóńiline shýaq syılaı bildi.
Ánshi 2003 jyly «Qazaqstannyń eńbek sińirgen qaıratkeri» qurmetti ataǵyna ıe boldy.
Rymkesh Jumadilova Kúlásh Baıseıitova atyndaǵy Respýblıkalyq án baıqaýynyń jáne Bakýde ótken Halyqaralyq Glınka atyndaǵy ánshiler baıqaýynyń laýreaty.
