Qazaqstannyń eńbek sińirgen ártisi Ómirserik Qalıuly dúnıeden ozdy
TALDYQORǴAN.QazAqparat - Qazaq óneri orny tolmas qazaǵa ushyrady. 71 jasqa qaraǵan shaǵynda QR eńbek sińirgen ártisi, "Parasat" ordeniniń ıegeri, qazaq teatr óneriniń tarlany Ómirserik Qalıuly qaıtys boldy, dep habarlaıdy QazAqparat tilshisi.
Marqummen qoshtasý rásimi Taldyqorǵanda 17 qyrkúıek kúni saǵat 10.00-de Bıken Rımova atyndaǵy oblystyq drama teatrynda ótedi.
Qalıuly Ómirserik 1947 jyly 1 mamyr kúni, Almaty oblysy Aqsý aýdany Basqan aýylynda (Jańalyq aýylynyń Kúlemjarǵan jerinde) dúnıege kelgen.
1970-74 jyldary Almatydaǵy Qurmanǵazy atyndaǵy Óner ınstıtýtynyń teatr fakýltetiniń akterlik bólimin bitirgen.1975 jyldan bastap Almaty oblystyq Bıken Rımova atyndaǵy drama teatrynda kúni búginge deıin akter bolyp qyzmet etti. Osy jyldarda 80-nen astan beınelerdi somdaǵan tájirıbeli akter. Atap aıtqanda, M.Áýezov «Abaı» - Abaı, «Qarakóz» - Asan, «Túngi saryn» - Táneke, «Men bir partııa, sen bir...» - Esimbek, «Eńlik - Kebek» - Espenbet. Ǵ.Músirepov «Aqan seri - Aqtoqty» - Balýan, «Qyz Jibek» - Bekejan, «Ulpan» - Artyqbaı, B.Maılın «Shuǵa» - Esimbek, I.Jansúgirov «Isataı -Mahambet» - Maldybaı, B.Toǵysbaev «Aqyn Sara» - Araı bolys, D.Isabekov «Kishkentaı aýyl» - Ormantaı, A.Shamkenovtiń "Ýákilderindegi" - Qordabaı, T.Esimjanovtyń "Jolda qalǵan jolaýshysyndaǵy" - Bóksebaı, T.Qalılahanovtyń « Abylaı amanatyndaǵy « Qabanbaı, "Tordaǵy totysyndaǵy" - Músápir batyr.T.Álipbaıdyń "Qandy ǵasyryndaǵy" -Ýágeı, "Sońǵy betpe-betindegi"- Ahmet, "O, Attıla,Attılasyndaǵy" - Rım papasy, K.Ábdirahmanovtyń "Qabanbaıyndaǵy" - Shaqalaq jáne basqa da kóptegen qoıylymdarda túrli obrazdardy somdaǵan talantty tulǵa.
Birneshe ret Respýblıkalyq, oblystyq baıqaýlardyń laýreaty,1992 jyly Qazaqstannyń eńbek sińirgen artısi ataǵy, 2000 jyly «Parasat» ordenimen nagradtalǵan.
