«Qazaqstannyń Eńbek Eri» ataǵyn alǵan tanymal azamattar

Ahmetjan Esimov

Álbette, bıylǵy jyly tabysty ótken «EKSPO-2017» halyqaralyq kórmesi týraly sóz qozǵasaq, Ahmetjan Smaǵululyn aınalyp óte almaımyz. Úsh aı boıy «Astana EKSPO-2017» Ulttyq kompanııasy» AQ Basqarma tóraǵasy óziniń komandasymen álemdik sharany sátti ótkizýge baryn saldy.

Ahmetjan Esimov 1990-1992 jyldary Qazaq KSR Memlekettik agroónerkásiptik komıteti tóraǵasynyń birinshi orynbasary, 1992-1994 jyldary Almaty oblysy ákimshiliginiń basshysy qyzmetin atqarǵan. 1994-1996 jyldary - QR Premer-mınıstriniń orynbasary bolyp, 1996-1998 jyldary - Memlekettik hatshy, budan keıingi qyzmetterde QR Premer-mınıstriniń birinshi orynbasary, Investıtsııa jónindegi memlekettik komıtettiń tóraǵasy, Prezıdenti Ákmishiliginiń basshysy, Benılıýks elderindegi (Belgııa Koroldigi, Nıderlandy Koroldigi jáne Lıýksembýrg Uly Gertsogtigi) QR Tótenshe jáne Ókiletti elshisi bolǵan.

2006-2008 jyldary QR Aýyl sharýashylyǵy mınıstri qyzmetterin atqaryp, 2008 jyldyń sáýirinen bastap Almaty qalasynyń ákimi bolǵan edi. 2015 jyldyń tamyzynda «Astana EKSPO-2017» Ulttyq kompanııasynyń» AQ Basqarma Tóraǵasy bolyp taǵaıyndaldy. «Qurmet belgisi», «Parasat», «Otan», «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordeni, medaldarmen marapattalǵan.

Rýslan Qýatov

«Qazaqstannyń Eńbek Eri» erekshe belgisin «Teńizshevroıl» JShS menedjeri Rýslan Qýatov ta alyp otyr. Munaı jáne gaz salasynyń bilgir mamany ári sarapshy «Teńizshevroıl» JShS-niń jetistikterimen maqtana alady. Qazaqstandyq munaıshylar sheteldik bilikti mamandardy almastyryp, jaýapty basshylyq laýazymǵa taǵaıyndalyp jatyr. Solardyń biri, osy salanyń maıtalmany - Rýslan Qýatov. Rýslan Turjanulynyń munaı salasynda eńbek etkenine 30 jyldan asyp ketken.

Rýlan Qýatov eńbek jolyn Balyqshy munaı-gaz barlaý ekspedıtsııasynda bastaǵan. Mektep kezinen bastap munaı-gaz salasyna erekshe qyzyǵýshylyǵy týypty. 1993 jyly Qazaqstandaǵy munaı ken oryndarynyń birin ıgerý úshin sheteldiktermen birlesken kásiporyn qurylyp, Rýslan Qýatov  «Teńizshevroıl» JShS shaqyrylady. Jumysty bas maman bolyp bastaǵan ol bilimi men tájirıbesiniń arqasynda keıin sheteldik mamandy almastyryp, basshylyq qyzmetke taǵaıyndalady.

«Munaı óndirisindegi tehnıkalyq jabdyqtardyń jumysyn qamtamasyz etýde Rýslan basqaratyn toptyń mańyzy erekshe. Bilikti basshy. Qyzmetkerlerge ylǵı da aǵalyq qamqorlyqpen qaraıdy», - deıdi Rýslan Qýatovtyń áriptesi Maıkl Pılloý.

Jaqsylyq Úshkempirov

Jaqsylyq Ámiráliulyn bilmeıtin adam Qazaqstanda kemde-kem. Ol - KSRO-nyń eńbek sińirgen sport sheberi. Ol - Qazaq KSR eńbek sińirgen jattyqtyrýshysy. Ol - Qazaq KSR erkin kúres boıynsha chempıony. Sonymen birge, Álem chempıony (1981), Álem kýbogynyń kúmis júldegeri (1980), Keńes Odaǵy birinshiliginiń eki dúrkin jeńimpazy (1975, 1980). Bir sózben, qazaq atyn álemge pash etken Jaqsylyq Ámiráliuly kez kelgen ataqqa laıyq.

Bala kezinen Qazaq kúresimen aınalysqan ol joǵary oqý ornynda júrgen kezinde kúrestiń klassıkalyq jáne erkin túrlerimen shuǵyldana bastaǵan. Keıin Roman Ilmatovtyń keńesimen kúrestiń klassıkalyq túrine kóshýdi jón kóredi. Arqadan asyryp laqtyrýda eshkimge ese bermegen Jaqsylyq Ámiráliuly osy ádispen eń myqty qarsylastaryn tize búktirgen eken. 1975 jyly Almatyda ótken altynshy jazǵy halyqtar Spartakıadasynda balýan eń myqty boz kilem sheberlerimen beldesip, chempıon atanǵan. Bul Úshkempirovtiń kóterilgen tuńǵysh tuǵyry edi. Budan keıin ol qazaq jerinde jeti dúrkin júldeger atanǵan.

1980 jyly Máskeýde ótken Jazǵy Olımpıada oıyndarynda balýandardyń arasynda Jaqsylyq Úshkempirov te bar edi. Olımpıadanyń jerebe rásiminiń qorytyndysy boıynsha qazaq balýany birinshi beldesýde álemniń eki dúrkin chempıony Aleksandrýǵa túsip qalady. Biraq, qaımyqpaǵan jas balýan eń myqtylardyń qataryndaǵy rýmyn Aleksandrý, polıak Kerpach, bolgar Hrıstov, vengr Shereshterdi qoǵadaı japyryp, jalpaq álemge Qazaq atyn pash etti.