Qazaqstannyń eń úzdik ýchaskelik ınspektorlary anyqtaldy
NUR-SULTAN. QazAqparat - Elordada «Polıtsııanyń úzdik ýchaskelik ınspektory» respýblıkalyq baıqaýynyń jeńimpazdary marapattaldy, dep habarlaıdy QazAqparat tilshisi.
Baıqaý barysynda elimizdiń 195 myń turǵyny áleýmettik jeli arqyly úzdik ısnpektorlarǵa daýys bergen.
«Respýblıkalyq mańyzy bar qalalardaǵy úzdik ýchaskelik ınspektor» atalymynda Shymkent qalasy Polıtsııa departamenti ál-Farabı aýdanynyń polıtsııa basqarmasynyń polıtsııa ınspektory Erbol ıÝsýpov úzdik dep tanyldy. Oǵan «Qazaqstan Respýblıkasynyń úzdik ýchaskelik ısnpektory» dıplomy, «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylaı syıaqy berildi.
«Oblystyq mańyzy bar qalalardaǵy úzdik ýchaskelik ınspektor» atalymy boıynsha Qostanaı qalasynyń Polıtsııa basqarmasynyń ýchaskelik polıtsııa ınspektory Jedilhan Nurpeıisov jeńimpaz atandy. Oǵan da «Qazaqstan Respýblıkasynyń úzdik ýchaskelik ısnpektory» dıplomy, «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylaı syıaqy tabystaldy.
«Aýyldyq eldi mekenderdegi úzdik ýchaskelik ınspektor» júldesin Almaty oblysy Qaratal aýdany polıtsııa bóliminiń ýchaskelik polıtsııa ınspektory Qýanysh Erasylov jeńip aldy. Oǵan mıınstr «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylaı syıaqy berdi.
Odan bólek, saltanatty sharada birqatar ýchaskelik ınspektorǵa merziminen buryn arnaıy ataqtar tabystaldy.
Jambyl oblysy Sarysý aýdandyq polıtsııa bóliminiń ýchaskelik polıtsııa ınspektory Narbekov Qanat Maratulyna jáne Qaraǵandy oblysynyń Polıtsııa departamenti Abaı aýdandyq polıtsııa basqarmasynyń ýchaskelik ınspektory, polıtsııa kapıtany Japparov Damır Qantaıulyna «Polıtsııa maıory» ataǵy men 2 laýazymdyq eńbekaqy kóleminde qarjylaı syıaqy berildi.
Atyraý oblysy Polıtsııa departamenti Atyraý qalalyq Polıtsııa basqarmasynyń ýchaskelik ınspektory, polıtsııa aǵa leıtenanty Álıev Erden Qanatuly men Aqtóbe oblysynyń Polıtsııa departamenti Aqtóbe qalalyq polıtsııa basqarmasynyń ýchaskelik ınspektory Sultanǵalıev Dastan Danashuly «Polıtsııa kapıtany» ataǵy men 2 laýazymdyq eńbekaqy kóleminde qarjylaı syıaqy aldy.
Odan bólek, birneshe ınspektor II dárejeli «Іshki ister organdarynyń úzdigi» tósbelgisimen jáne «Qazaqstan Respýblıkasy Іshki ister mınıstrliginiń Alǵys hatymen» marapattaldy. Marapattalǵan barlyq qyzmetkerlerge qarjylaı syıaqy berildi.
QR ІІM habarlaýynsha, ýchaskelik polıtsııa ınspektorlarynyń tikeleı jumysy arqyly jyl saıyn 40 myńǵa jýyq qylmys ashylady. Elimizde 166 myńǵa jýyq adam, 8,5 myń otbasy jáne 7 myńǵa jýyq kámeletke tolmaǵandar ýchaskelik polıtsııa ınspektorlarynyń baqylaýynda tur.
