Qazaqstannyń eń úzdik sportshysyn tańda - Konkýrs
ALMATY. 1 jeltoqsan. QazAqparat /Erbol Azanbek/ - Búgin Qazaqstannyń 2010 jylǵy eń úzdik sportshysyn anyqtaýǵa arnalǵan konkýrs bastaldy.
Bul týraly búgin sharanyń uıymdastyrýshysy «Sport Review» jýrnalynan habarlady.
Esterińizge sala keteıik, jýrnal ujymy buǵan deıin 2010 jyldyń eń úzdik sportshylaryn tańdaý konkýrsy ótkiziletinin habarlaǵan bolatyn. Redaktsııa ujymy konkýrsqa qatysýshy eń úzdik 5 er sportshy retinde aýyr atlet Ilıa Ilın, tennısshi Andreı Golýbev, veloshabandoz Aleksandr Vınokýrov, fýtbolshy Nurbol Jumasqalıev, boksshy Danııar Eleýsinovti tańdap alǵan. Al eń úzdik áıel sportshylar qatarynda aýyr atlet Svetlana Podobedova, tennısshi ıAroslava Shvedova, bıatlonshy Elena Hrýstaleva, jeńil atlet Olga Rypakova, mergen Záýresh Baıbosynova bar.
Uıymdastyrýshylardyń habarlaýynsha, jeńimpaz oqyrmandar daýsy men belgili sport jýrnalısteriniń daýsy arqyly anyqtalady. Jankúıerler óz sportshysyna daýys berý úshin redaktsııanyń 050008, Almaty q., Sátbaev kóshesi, 29 «A», 32 keńse meken-jaıyna joǵarydaǵy sportshylar arasynan ózi úzdik dep tapqan bir er, bir áıel sportshynyń aty jazylǵan hat joldaýy tıis. editor@sport-review.kz elektrondy poshtasyna hat joldaý arqyly da daýys berýge bolady. Daýys berý jeltoqsannyń 31-ne deıin jalǵasady. Al eń úzdik sportshynyń aty-jóni 2011 jyldyń 12 qańtarynda jarııa etiledi.
