Qazaqstannyń eń úzdik otbasy 12 qyrkúıek kúni anyqtalady

Bul týraly QR Prezıdenti janyndaǵy Áıelder isi jáne otbasy-demografııalyq saıasat jónindegi ulttyq komıtet tóraıymy Mahabbat Bekbosynova aıtty.

«Ózderińiz bilesizder, saıystyń oblystyq kezeńi 23 mamyrda ótken bolatyn. Onda jeńiske jetken otbasylar Astanada ótetin konkýrstyń aqtyq saıysy men "Mereıli otbasy" gala-kontsertine qatysýǵa múmkindik aldy. Bul shara Otbasy kúni qarsańynda ótkizilip, 12 qyrkúıek kúni elimizdegi eń úzdik otbasy belgili bolady», - dedi M.Bekbosynova OKQ uıymdastyrǵan brıfıngte.

Onyń aıtýynsha, «Mereıli otbasy» konkýrsy bıyl Qazaqstannyń barlyq óńirlerinde 1 sáýirde bastalǵan bolatyn. Oǵan 500-den astam otbasy qatysty.

«Saıystyń birinshi kezeńi qalalar men aýdandar deńgeıinde ótti. Al ekinshi kezeń oblystar men Astana, Almaty qalalary deńgeıinde ótti», - dep atap ótti M.Bekbosynova.

Aıta keteıik, aqtyq synǵa ótken 16 úmitker otbasynyń ishinde úzdigin tańdaý SMS-habarlamalar jáne ınternet arqyly daýys berý nátıjesinde júrgiziledi. Daýys berýdiń bastalýy týraly aqparat ulttyq telearnalar arqyly jarııalanady. Fınaldyń telenusqasy Otbasy kúni, ıaǵnı 14 qyrkúıekte kórsetiledi.