Qazaqstannyń eń úzdik búrkitshisi anyqtaldy
Búrkitshiler saıysy boıynsha Atyraý oblysynan qatysqan Imanǵalı Abdýlkárimuly jeńimpaz atandy. Ekinshi orynda almatylyq Áset Ádilov, al úshinshi oryndy Serikbolsyn Jalǵasuly (Jambyl oblysy) men Dıas Kúntýǵan (Astana qalasy) aldy.
Qarshyǵany qolǵa shaqyrýdan Almaty oblysynyń ókili Seıitjan Beksultan bas júldeni ıelendi. Júldeli ekinshi orynǵa Túrkistan oblysynan kelgen Pań Tólemyrza ıe bolsa, úshinshi oryndy elordalyq Erasyl Serikbekuly men túrkistandyq Muhammed Namazbaı ózara bólisti.
Itelgi salýdan Túrkistan oblysynan kelgen Músálim Salmanǵa teń keler qusbegi bolǵan joq. Júldeli ekinshi orynda Jambyl oblysynyń namysyn qorǵaǵan Berikbolsyn Babajan, al úshinshi orynǵa Pań Tólemyrza (Túrkistan oblysy) men Erdana Samǵat (ShQO) turaqtady.
Komandalyq esepte Túrkistan oblysynyń qusbegileri 1 altyn, 1 kúmis, 2 qola medal qanjyǵylap, kósh bastady. Atyraý jáne Almaty oblysynyń ókilderi ekinshi jáne úshinshi orynǵa jaıǵasty.
«Jarysqa elimizdiń túkpir-túkpirinen jınaldyq. Qusbegilik óneri qazaq halqynyń ejelden kele jatqan kóne dástúriniń biri ekeni ras. Kóshpendiler ómirinen berik oryn alǵan bul óner túri búgingi tańda jastar arasynda da tanymal. Jarysqa baptaǵan búrkitimniń aty – Alabas. Daıyndyqqa 5-6 aıdaı ýaqyt qajet boldy. Jalpy, jarystyń uıymdastyrylýy kóńilimnen shyqty. Qarsylastarym da myqty boldy. Mundaı sporttyq sharalardyń ulttyq dástúrin dáripteıtin, elin, jerin súıetin azamattar tárbıeleýde mańyzy zor dep esepteımin», - dedi búrkitshiler arasynda chempıon atanǵan Imanǵalı Abdýlkárimuly.
Chempıonatqa Almaty, Qaraǵandy, Jambyl, Shyǵys Qazaqstan, Túrkistan, Mańǵystaý, Atyraý, Abaı, Jetisý oblystarynyń, sondaı-aq Astana jáne Almaty qalalarynyń 70-ke jýyq sportshysy qatysqan bolatyn.
«Qusbegilik ulttyq sporty qazaq tarıhynda tamyry tereńge taraǵan elimizdiń tól mádenı qundylyǵy bolyp sanalady. Qusbegilik QR Sport jáne dene shynyqtyrý isteri komıtetiniń buıryǵymen ulttyq sport túri retinde tanylǵan sátten bastap 7 memlekettiń qatysýymen 1 ret Álem chempıonaty, 2 ret Azııa chempıonaty (5 memleket), 40-qa jýyq halyqaralyq týrnır men 15 ret Qazaqstan Respýblıkasynyń chempıonattary uıymdastyryldy. Atalǵan sport túri Astana, Almaty qalalarynda jáne elimizdiń basqa da óńirlerinde turaqty damyp keledi. Bizdiń maqsatymyz – ata dástúrimizdi dáriptep, san ǵasyrdan beri ádet-ǵurpymyzǵa sińisti bolǵan dara ónerimizdi buqaralyq sportqa aınaldyrý. Álemdik deńgeıge kóterip, Otanymyzǵa saıahattap kelýshi týrısterdiń qyzyǵýshylyǵyn týǵyzatyndaı dárejege jetkizý. Sol baǵytta jumys atqaryp jatyrmyz jáne jalǵastyra beremiz», - dedi respýblıkalyq qusbegilik federatsııasynyń vıtse-prezıdenti Janjigit Omarhan.
Foto: Qusbegilik federatsııasy
