Qazaqstannyń eń baı azamaty «Formýla-1» komandasyn satyp aldy
ASTANA. QazAqparat - Qazaqstandyq kásipker Vladımır Kım quramyna alty jarys komandasy kiretin Hitech Global Holdings kompanııasynyń aktsııasyn satyp aldy, dep habarlaıdy QazAqparat Sports.kz portalyna silteme jasap.
Qazirgi ýaqytta F2, F3 jáne F4 jarystaryna qatysyp jatqan sılverstoýndyq komanda dúısenbi kúni ózderiniń ıesi Hitech Global Holdings Limited kompanııasy 25 protsent úlesin qazaqstandyq kásipker Vladımır Kımge satqanyn málimdedi.
Kımniń negizgi kásibi taý-ken óndirisi, bank jáne avıatsııa salasymen baılanysty. Ol sondaı-aq Qazaqmys pen KAZ Minerals Group kompanııalaryna basshylyq ete otyryp, álemdegi mys óndirýshilerdiń TOP-ondyǵyna enip otyr.
«Men avtosportqa burynnan qyzyǵatynmyn jáne kóp sanat boıynsha jeńiske jetken ári bolashaqqa degen jospary myqty uıymmen seriktes bolǵanyma qýanyshtymyn. Sportpen burynnan qalyptasqan baılanysymyz bar. Biraq bul bizdiń avtosportqa quıǵan alǵashqy iri ınvestıtsııamyz. Onyń dınamıkalyq turǵyda tartymdylyǵy, tanymal sport túri bolyp kele jatqany, bızneske degen marketıng múmkindikteri men jankúıerleriniń artyp kele jatqany meniń jeke jáne kommertsııalyq ambıtsııalaryma saı keledi», - dedi V.Kım.
2026 jylǵy maýsymnan bastap Hitech komandasy Formýla-1-ge qatysady.
Forbes nusqasy boıynsha Kım Qazaqstandaǵy eń baı adam. Onyń múlki - 4,6 mıllıard dollar jáne ol álemdik reıtıngide 607-shi orynda tur.
