Qazaqstannyń Elshisi Serbııanyń Prezıdentine senim gramotalaryn tapsyrdy

NUR-SULTAN. QazAqparat – Serbııa Saraıynda Qazaqstan Respýblıkasynyń Elshisi Ǵabıt Syzdyqbekov Serbııa Respýblıkasynyń Prezıdenti Aleksandr Výchıchke senim gramotalaryn tapsyrdy. Bul týraly QazAqparat SІM silteme jasap habarlaıdy.

Ekijaqty kezdesý aıasynda Ǵ.Syzdyqbekov Serbııa Prezıdentine qazaqstandaǵy áleýmettik-ekonomıkalyq jaǵdaı jóninde, sondaı-aq qyrkúıek aıyndaǵy QR Prezıdenti Qasym-Jomart Toqaevtyń Joldaýynda belgilengendeı eldi odan ári reformalaý jáne qazaqstandyq qoǵamdy damytý jónindegi sharalar týraly habardar etti.

Suhbattasý barysynda eki el arasyndaǵy yntymaqtastyqtyń barlyq baǵyttary boıynsha, birinshi kezekte, ózara saýda jáne ınvestıtsııalar, qurylys jáne ınfraqurylym salalaryndaǵy ekijaqty yntymaqtastyqtyń áleýeti talqylandy.

Sonymen qatar, ekonomıkalyq yntymaqtastyq jónindegi ekijaqty Úkimetaralyq komıssııanyń tıimdiligin arttyrýdyń erekshe mańyzy atalyp ótildi. Mádenı-gýmanıtarlyq salada joǵary jáne kásibı bilim berý mekemeleri arasynda tyǵyz yntymaqtastyq ornatý, sport jáne shyǵarmashylyq ujymdarynyń ózara saparlaryn uıymdastyrý jáne basqa da salalardaǵy ózara tıimdi baılanystardy damytý máselelerine erekshe nazar aýdaryldy.

Qazaqstan elshisi EAEO memleketteri men Serbııa arasyndaǵy erkin saýda aımaǵy týraly kelisimniń Qazaqstan men Serbııa arasyndaǵy saýda-ekonomıkalyq yntymaqtastyqty ekijaqty jáne kópjaqty túrde jandandyrýǵa múmkindik beretinin atap ótti.

Serbııa Prezıdenti ekijaqty qarym-qatynastardyń joǵary deńgeıin tilge tıek ete otyryp, eki el arasyndaǵy dástúrli dostyq baılanystardy odan ári nyǵaıtý men damytýǵa, jáne de joǵary deńgeıdegi ózara saparlar uıymdastyrýǵa daıyndyǵyn jetkizdi.

Júzdesý sońynda A.Výchıch Qazaqstan Elshisiniń jumysyna sáttilik tiledi.