Qazaqstannyń «elektrondyq úkimetin» damytýdy kózdeıtin zań jobasy ekinshi oqylymda depýtattardyń talqysyna salynady
ASTANA. Mamyrdyń 26-sy. QazAqparat - Májilistiń Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń «elektrondyq úkimetin» damytý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymǵa daıyndady,
dep habarlaıdy QazAqparat.
Aıta ketý kerek, osy zań jobasy aǵymdaǵy jylǵy sáýirdiń 21-i kúni birinshi oqylymda maquldandy.
Bul zań jobasynyń maqsaty - aqparattyq júıelerdi qoldana otyryp, elektrondyq nysanda memlekettik qyzmetter kórsetýdi retteıtin quqyqtyq normalardy belgileý jolymen «elektrondyq úkimet» júıesin damytý. Sondaı-aq ákimshilik rásimderdi ońtaılandyrý, elektrondyq memlekettik qyzmetter kórsetý máselelerinde memlekettik basqarý sapasy men tıimdiligin arttyrý jáne olardyń ashyqtyǵyn qamtamasyz etýdi kózeıdi.
Zań jobasyn ekinshi oqylymǵa daıyndaý barysynda «elektrondyq úkimetti» damytý, memlekettik aqparattyq júıelerdi paıdalaný kezinde memlekettik tildegi aqparattyń kólemin aıqyndaý, sondaı-aq baǵdarlamalyq ónimderdi ınterfeıspen (aqparattyq júıeni beıneleýmen) memlekettik tilde engizý máselelerine qatysty normalardy jaqsartý jáne naqtylaý jóninde usynystar kelip túsken.
