Qazaqstannyń elektr energetıkalyq salasyn damytý týraly baǵdarlama jobasy kúzde daıyn bolady
ASTANA. 15 mamyr. QazAqparat - Qazaqstannyń elektr energetıkalyq salasyn damytý týraly baǵdarlama jobasy aǵymdaǵy jyly kúzde daıyn bolýy tıis. Osy qujattyń engizilýi «Samuryq-Energo» AQ «Halyqtyq IPO» baǵdarlamasyna qatysýynyń mindetti sharty. Bul týraly halyk-ipo.kz portalyna atalmysh kompanııanyń Basqarma tóraǵasy Almasadam Satqalıev aıtty.
«Salany damytý baǵdarlamasyn ázirleýmen Indýstrııa jáne jańa tehnologııalar mınıstrligi aınalysýda. Premer-Mınıstr jumysty osy jyldyń kúzine deıin aıaqtap, qujatty tanystyrýdy mindettedi. Biz baǵdarlama jobasyn daıyndaý jónindegi jumys tobynyń quramyna kiremiz», - dedi ol.
A. Satqalıevtyń sózinshe, «Samuryq-Energo» AQ «Halyqtyq IPO» baǵdarlamasyna shyǵýǵa daıyndyqty bastap ketti. «IPO-ǵa shyǵatyn merzimdi Úkimet pen aktsıonerimiz - «Samuryq-Qazyna» qory anyqtaıdy», - dedi kompanııa basshysy.
«Samuryq-Energo» AQ «Halyqtyq IPO» baǵdarlamasy aıasynda aktsııalaryn ornalastyrý josparlanyp otyrǵan memlekettik kompanııalar tizimine kiredi.
