Qazaqstannyń EQYU-ǵa Tóraǵalyǵyna arnalǵan maqalalar men suhbattar «Saltanat» atty jınaqqa toptastyryldy
ASTANA. 1 shilde. QazAqparat /Jasulan Amanbaıuly/ - Búgin Astanada «Egemen Qazaqstan» gazeti shyǵarǵan «Saltanat» atty maqalalar jınaǵy tanystyryldy.
Onda basylymnyń Qazaqstannyń 2010 jyly Eýropadaǵy qaýipsizdik jáne yntymaqtastyq uıymyna tóraǵalyq etýi barysynda jarııalanǵan tarıhı ári ozyq oıly materıaldary enip otyr.
Jınaqqa gazet betinde shyqqan maqalalardan bólek, Elbasy Nursultan Nazarbaevtyń túrli minberlerden EQYU jumysyna, tóraǵalyqqa baılanysty aıtqan sózderi, otandyq jáne sheteldik halyqaralyq basylymdarǵa bergen suhbattary kirgen.
«Saltanat» kitaby Prezıdenttiń syrtqy saıasat salasyndaǵy tamasha tabystaryn kórsetýge arnalǵan. Onyń ishinde, naqty aıtqanda, ótken jyly bizdiń elimizde bolǵan uly oqıǵa - Qazaqstan Respýblıkasynyń TMD elderi arasynan birinshi bolyp, búkil túrki áleminiń, búkil musylman jurty ishinen birinshi bolyp Eýropanyń tórine kóterilýi. Sol Uıymnyń 11 jyldan beri shaqyrylmaı kele jatqan Sammıtin shaqyrýǵa, ony tamasha tabyspen ótkizýge qol jetkizýin kórsetýge arnalǵan», - dedi «Egemen Qazaqstan» respýblıkalyq gazeti» aktsıonerlik qoǵamynyń prezıdenti Saýytbek Abdrahmanov kitaptyń tusaýkeser rásiminde.
S. Ábdrahmanovtyń atap kórsetkenindeı, atalǵan kitapqa «Astana Sammıti» degen ataýmen tarıhqa engen halyqaralyq deńgeıdegi mańyzdy sharanyń barlyq bolmysyn kórsetken materıaldar da túgel engizilgen.
Sondaı-aq EQYU Bas hatshysy Mark Perren de Brıshambomen, Uıymnyń Knýt Vollebek, Petros Eftımıý, ıAnez Lenarchıch syndy qaıratkerlerimen, TMD elderi parlamentarııleri ókilderimen bolǵan suhbattar toptastyrylǵan.
QR Syrtqy ister vıtse-mınıstri Qaırat Sarybaıdyń pikirinshe, ǵylymı turǵydan kelgende «Saltanat» jınaǵy bolashaq urpaqtarǵa jaqsy azyq bolmaq. Onyń aıtýynsha, der kezinde muqııat jınalyp shyqqan bul eńbek, halyqaralyq qatynastar mamandarynyń, saıasattanýshylardyń jáne dıplomattardyń úlken qyzyǵýshylyǵyna ıe bolyp otyr.
Jeti júzden astam betten turatyn jınaqtyń taralymy 1 myń dana. Ony basyp shyǵarýǵa Soltústik Qazaqstan oblysynyń ákimi S. Bilálov pen «Jeti jarǵy jáne Qojabergen jyraý» qorynyń tóraǵasy, metsenat B. Turǵaraev járdem kórsetti.
