Qazaqstannyń EQYU-ǵa múshe bolǵan 25 jyldaǵy jetistikteri atalyp ótti
ASTANA. QazAqparat - 30 qańtarda Qazaqstan Respýblıkasy men Eýropadaǵy qaýipsizdik jáne yntymaqtastyq uıymy (EQYU) belsendi yntymaqtastyǵynyń 25 jyldyǵyn atap ótýde, dep habarlaıdy QR SІM baspasóz qyzmeti.
«Qazaqstan 1992 jylǵy 30 qańtarda Eýropadaǵy qaýipsizdik jáne yntymaqtastyq jónindegi keńestiń (1995 jyly EQYU-ǵa ózgertildi) tolyqqandy múshesi bolyp, shırek ǵasyrdyń ishinde uıymnyń damýyna zor úlesin qosyp keldi. Qazaqstan 2010 jyly postkeńestik elderdiń ishinen birinshi bolyp uıymdy basqardy», delingen habarlamada.
2010 jyldyń jeltoqsan aıynda Astana, 11 jyldan keıin, qazirgi jáne bolashaq qaýipsizdiktiń negizgi baǵyttaryn anyqtaý úshin memleket jáne úkimet basshylarynyń qatysýymen uıymnyń týy astynda alǵash ret mańyzdy jáne sońǵy EQYU Sammıtin uıymdastyrdy.
Astanada ótken EQYU Sammıtinde qabyldanǵan deklaratsııa uıymnyń aldynda turǵan mindetteri men syn-qaterlerin aıqyndaıtyn, keń aýqymdy qujat bolyp tabylady. Astana deklaratsııasy qaqtyǵystardan jáne elder arasyndaǵy qarama-qaıshylyqtardan erkin, eýroatlantıkalyq jáne eýrazııalyq keńistiginde uıymǵa barlyq qatysýshy memleketterin biriktirýge, sondaı-aq jańa qaýip-qaterlerge qarsy turýǵa baǵyttalǵan qaýipsizdik qoǵamdastyǵyn qurýdy kózdeıdi.
QR Syrtqy ister mınıstri Q.Ábdirahmanov 30 qańtarda Astanada depýtattyq korpýstyń ókilderiniń, atqarýshy bılik organdarynyń, azamattyq qoǵamnyń jáne halyqaralyq uıymdardyń qatysýymen ótken QR Syrtqy ister mınıstrliginiń «Adamı ólshem jónindegi dıalog alańy» konsýltatıvtik-keńesshi organnyń otyrysynda qatysýshylardy QR-EQYU yntymaqtastyǵynyń 25 jyldyǵymen quttyqtap, Qazaqstannyń Uıymdaǵy músheligi kezeńindegi jetistikterin atap ótti.
