Qazaqstannyń eksporty ulǵaıdy
ASTANA. QazAqparat - 2018 jyly on bir aıdyń ishinde jalpy eksporttyń kólemi 54,7 mıllıard AQSh dollaryna jetti, dep xabarlaıdy QazAqparat tilshisi.
QR Indýstrııa jáne ınfraqurylymdyq damý vıtse-mınıstri Arystanbek Qabykenovtiń aıtýynsha, Qazaqstannyń eksporty bir jyldyń ishinde 26,4 protsentke ósti. Sonyń ishinde shıkizattyq emes ónimderdiń kólemi 2,9 protsentke artyp, 14,3 mıllıard dollardy qurady. Al óńdeý ónerkásibiniń eksporty 9 protsentke ósip otyr.
«Búginde Qazaqstan 119 elge 800-ge jýyq ónimdi eksporttaıdy. Eksporttyq qorjynymyz jyl saıyn orta eseppen 5-8 ónimmen tolyqtyrylyp otyrady. Atap aıtqanda, 2017 jyly eksporttyq taýarlardyń jańa toptary - avtokólikter, kún panelderi, gaz qazandyqtary, kartrıdjder, relster jáne posttermınaldar, al 2018 jyly Birikken Arab Ámirlikteriniń naryǵyna baldy ónerkásiptik mólsherde eksporttaı bastadyq. Qytaı Halyq Respýblıkasynyń naryǵyna alǵash ret qazaqstandyq balmuzdaqty shyǵara bastadyq. Budan bólek, mınıstrliktiń qoldaýymen Qytaıda uıymdastyrylǵan saýda-ekonomıkalyq mıssııanyń sheńberinde alǵash ret Qazaqstannan et jetkizildi. Kelisimshart bes jylǵa jasaldy», - dedi A.Qabykenov Úkimet úıinde ótken baspasóz máslıxatynda.
Onyń sózine qaraǵanda, ótken jyly Sııan qalasynda Qazaqstannyń birinshi saýda úıi ashyldy. Aǵymdaǵy jyly ol jerge otandyq ónimder jetkiziletin bolady. Sondaı-aq, taýarlarymyz Qytaıdyń elektrondy saýda jelileri arqyly satylady degen jospar bar.
